Idortea: Ipar Euskal Herri osoa « Alerta » mailan edateko uraren erabileran

Lurraldean duela zenbait hilabetetik instalatu den idortearen aitzinean, Pirinio Atlantikoetako prefetak erabaki du Ipar Euskal Herriko herri guziak « Alerta » mailan ezartzea edateko uraren erabilerari dagokionez, uztailaren 28ko 18:00etatik goiti.

Azken egunetan egin duen euri apurra ez da aski joera irauli ahal izateko. Izan ere, eguraldi idorra, tenperatura altuak eta euri eskasia kronikoa dira nagusi. Gaur egun, ibaietako emariak oso maila kezkagarrietara iritsi dira. Urdazurik, Iholdiko errekak eta Uhaitza egoera kritikoan dira, Errobi berriz alerta azkartuan da.

Egoera horrek zuzenean eragiten dio edateko uraren ekoizpenari, are gehiago uda garaian lurraldeak %20tik %30era bitarteko eskaera gehigarriari erantzun behar dionean. Kontsumo-gailurrak saihesteko eta ahuldu baliabidea zaintzeko, guziei galdetzen zaie ezinbestekoak ez diren edateko ur erabilerak mugatzeko.

Baratzezaintzako ustiategien egoera ere bereziki zaindua da. Ur-ekarpen erregular baten menpe diren laborantza horiek, ziklo laburrekoak izanik, galera konpon ezinak jasan ditzakete ureztapena gelditzen bada. Euskal Hirigune Elkargoak hala galdeturik, prefetak baimendu du ekoizle profesionalen baratze-, lorezaintza- eta hezurdun fruituen laboreak egunez ere noizbehinka ureztatzea.

Egoera berrikusiko da agorrila hasieran eginen den idorte batzordearen ondoko bilkuran. 

« Alerta » mailako murrizketa nagusiak

Norbanakoak

• Baratzeak, belardiak eta aisialdirako lorategiak: ureztatzea debekatua da 08:00etatik 20:00etara.
• 1 m³ baino gehiagoko igerileku pribatuak: betetzea debekatua da, maila eguneratzeko izan ezik.
• Etxean ibilgailuak garbitzea: debekatua.
• Fatxadak, teilatuak, espaloiak eta gainerakoak garbitzea: debekatua, osasun edo segurtasun arrazoiengatik izan ezik.
• Zirkuitu irekiko apaingarri-iturriak: geldiarazi behar dira teknikoki posible denean.

Enpresa eta profesionalak

• Ibilgailuen eta itsas aisialdiko ibilgailuen garbiketa profesionala: debekatua, ur gutxi kontsumitzen duten dispositiboak erabiltzeko edo arrazoi sanitarioengatik izan ezik.
• Fatxadak, teilatuak, bideak eta azalera iragazgaitzak garbitzea: debekatua, segurtasunari, osasunari edo lan jakin batzuei lotutako salbuespenak izan ezik.
• Kirol zelaiak: ureztatzea 20:00etatik 08:00etara bakarrik baimendua da, astean gehienez bi aldiz.
• Golf zelaiak: ureztatzea debekatua da, green-ak eta hasierako eremuak salbu, eta asteko ur-kontsumoa gutienez %60 murriztu behar da.
• Publikoa hartzen duten igerilekuak: betetzea debekatua da, ARS Osasun Agentziak baieztatutako premia sanitario baten kasuan izan ezik.

Laborariak

• Laborantzen ureztapena: ur-hartzeetan murrizketak ezarri dira.
• Baratzezaintza, lorezaintza eta fruitu-arbolen laborantzak: ureztatze lokalizatua baimendua da 20:00etatik 08:00etara; gainera, egunez ere noizbehinkako ureztatzea baimendu ahal izango da ekoizle profesionalentzat, laborantzak bizirik atxikitzeko beharrezkoa denean, prefetaren neurri berriaren arabera.
• Abereen edanaraztea: ez da murrizketarik.

Helbide jakin batean aplikatzen diren murrizketak ezagutzeko, erabiltzaileek Estatuaren zerbitzuek eguneratutako informaziora eta VigiEau webgunera (fransezez) jo dezakete.

Murrizketak errespetatzen ez dituztenek 1.500 euro arteko isuna jaso dezakete pertsona fisikoen kasuan, eta 7.500 euro artekoa enpresen kasuan. Behin baino gehiagotan gertatzekotan, zigorrak bikoiztu ahal izango dira.