Ipar Euskal Herria: klima aldaketaren eraginak aurreikusteko atlas bat 2050erako

Euskal Hirigune Elkargoak, hemendik 2050 urtera klima-aldaketak lurraldean nola eragin dezakeen irudikatzeko aukera ematen duen atlas bat sortu du. Ceremaren (Arrisku, ingurumen, mugikortasun eta lurralde antolaketarako Ikerketa eta aditu zentroa) laguntzarekin eginiko lan honek, klima-arriskuak hobeto ulertzen eta herritarrak, ingurune naturalak eta azpiegiturak babesteko ekintza zehatzak prestatzen lagunduko die tokiko zerbitzuei eta lurraldeko eragileei.

Zazpi fenomeno klimatiko xeheki aztertuak

Diagnostikoak, gaika antolaturiko 19 fitxaz osatua den atlas kartografiko baten forma hartzen du Mapa horiek, zazpi klima fenomeno nagusiek lurraldean nola eraginen duten zehazki irudikatzeko parada ematen dute: berote handiak, idorteak, uholdeak eta lur litatzeak eraginen dituzten eurite handiak, suteak, kostaldearen higadurak, itsas mailaren igotzeak eta buztinen uzkurdura-hedapen fenomenoak. Fenomeno bakoitzarentzako, mapek 2050erako proiekzio klimatikoak tokiko errealitateekin gurutzatzen dituzte, hauen artean egoera ahulean den biztanleriaren, jarduera ekonomikoen eta azpiegituren kokapena.

Adibide zehatzak lurraldean

Mendiko eremu batzuk bero handiekiko bereziki zaurgarri gisa agertzen dira, Errobi-Aturri eta Bidaxunealdeko laborantza lurraldeek idorte luzeen eragina azkarkiago pairatzen halako luketen bitartean. Diagnostikoak, halaber, buztin zolen uzkurdura-hedapenekiko zaurgarri diren Baionako hirigune eta Amikuze arteko herriak agerian ezartzen ditu eta, fenomeno honek, eraikuntzen ahultzea eragin dezake idorte eta eurite handiak aldizkatzean.  

Lan honek egokitzapen orokorrerako estrategia baten lehen urratsa osatzen du, 2027ko Klima Planaren eguneraketaren menturan. 2027tik aitzina legeak ofizialki aitortuko duen Klima Aldaketara Egokitzeko erreferentziazko Beroketa Ibilbidea (KAEBI, fr. TRACC) barne hartzen du. Orduan, lurraldeek baltsako koadro bat ukanen dute, klima aldaketara egokitzeko haien ekintzetan gidatzeko.