Idortea Ipar Euskal Herrian: Hazparne eta Ortzaize alerta mailan, Iholdiko erreka krisi egoeran

Aste batzuk beroaldi handiekin pasa ondotik eta euri esanguratsurik izan ez denez, ibaietako emariak gutxitzen segitzen du, ur beharrak handitzen ari diren bitartean, bai edateko uraren hornikuntzarako, bai laborantza erabileretarako.

Ur baliabidea modu iraunkorrean zaintzeko eta lehentasunez edateko uraren hornidura bermatzeko, prefeturak erabaki du Hazparne eta Ortzaize “Alerta” mailan ezartzea edateko urari dagokionez. Horren ondorioz, erabilera-murrizketa hauek ezarriko dira:

• Lorategiak eta kirol zelaiak ureztatzea debekatua da 08:00etatik 20:00etara;
• Norbanakoek edo partikularrek beren ibilgailuak garbitzea debekatua da;
• Etxeko igerilekuak edateko uraren sarearekin betetzea debekatuta da (maila berriz igotzeko kasuetan izan ezik).

Bestalde, ingurune naturaletatik egiten diren ur-hartzeen mugak indartu dira, eskuragarri diren ur-baliabideak babesteko.
Euskal Herriko arro hidrografikoen egoerak okerrera egin du:

• “Alerta indartua” maila: Uhaitza eta Urdazuri-Untsin;
• “Krisi” maila: Iholdiko erreka.

Ibaietan behar adinako emaria mantentzea da neurri horien helburua, ur-inguruneak babestea, edateko ur baliabideak bermatzea eta, epe luzera, uraren erabilera desberdinak bateragarri egitea. Estatuko zerbitzuek astero jarraipena egiten diete ibai nagusiei, neurriak egoera hidrologikoaren eta beharren bilakaerara egokitzeko.

Idorte testuinguru honetan, agintariek herritarrak eta profesionalak ura neurriz kontsumitzera deitzen dituzte.

Indarrean diren murrizketa edo debeku guztiei buruzko xehetasun gehiago izateko, kontsultatu Pirinio Atlantikoetako Estatuko zerbitzuen webgunea:
https://www.pyrenees-atlantiques.gouv.fr/Actions-de-l-Etat/Cadre-de-vie-eau-environnement-et-risques-majeurs/Secheresse/Situation-actuelle 
eta VIGIEAU webgunea: https://vigieau.gouv.fr