"Tonu arin eta baikorra hautatu dugu gure autobusetara igotzeko gogoa pizteko!"

Merkeagoak, estres gutiagokoak, lasterragoak

2025eko urtarrilaren lehenean sare berria abiarazi zenetik, « gaur egun badira ibilbide zenbaitetan autobusak, autobus handiak edo tram-busak 10, 15 edo 20 minuturo, azaldu du Xavier Gaudel-Estèvek, TXIK TXAK-eko marketin arduradunak Euskal Hirigune Elkargoko Mugikortasunen Sindikatuan. Baina hori oraindik ez da aski ezaguna, eta maiztasun berri horien berri eman behar dugu. » Automobilistak interpelatzeko, Bloom Stories agentziak —Sindikatua­rekin batera kanpaina pentsatu duenak— bide nagusietatik abiatu da, kokapenaren araberako publizitate egokituekin. Sareko geltoki batzuk, autobusen gibelaldea eta txartel banagailuak ere kontuan hartu dizute. Batzuetan saturatuak diren ardatz estrategiko horietan, « eskaintza oso lehiakorra proposatzen dugu », azpimarratzen du Xavier Gaudel-Estèvek. Mezuak garraio publikoen abantailak trebeki azpimarratzen ditu: autoa baino askoz merkeagoak, sinpleagoak eta orain lasterragoak; estres gutiago sortzen dute eta denbora gehiago uzten dute norberarentzat. « Baina ez dugu automobilista errudun sentiarazi nahi. Tonu arin eta baikorra hautatu dugu gure autobusetara igotzeko gogoa pizteko. »

Romuald gidari gaztea da. Tram-busa jadanik saiatua du, baina ez zuen sekula entzun enplegatzailearen parte-hartzearen berri. Afixetan behin eta berriz ageri den hilabeteko 15,5 euroko eskaintzak erakar lezake « batez ere udan, hondartzez gozatzeko aparkatu beharrik gabe ». Franckentzat, berriz, 40 urtekoa, pausoa egitea zailagoa da. Sarri mugitzen da lanagatik eta ez du gustuko garraioetan geldi egotea. Hala ere, noizean behin T1 hartzen du gauez ateratzen denean, eta zinezko aitzin pauso bat dela ikusten du. « Nire haurtzaroan lotura anitz behar ziren, ibilbideak luze eta korapilatsuak ziren, orain gauzak anitz aldatu dira », onartzen du.

Ikusi bideo guziak

TXIK eta TXAK, sareetako heroiak

Bidaiaren esperientzia biziaraztea jarrerak aldatzeko, horixe da dispositibo digitalaren xedea, afixaketa kanpainarekin elkarloturik pentsatua. Smog Films estudioak egina, lau ataleko web-saioak tonu bereko umore arin eta desbideratua darabil. « Kontzeptu original bat asmatu dugu bi pertsonaia berezirekin: TXIK eta TXAK, azaldu du Xavier Gaudel-Estèvek. Bat oso baikorra da, guztiz konbentzitua; bestea pausatuagoa eta arrazionalagoa. » Bakoitza bere maneran saiatuko da garraio publikoen inguruko aurreiritziak hausten, auto gidariak TXIK TXAK sareko ibilbide berezi bat saiatzera bultzatuz. « Ohiko aurreiritzietatik abiatu gara: badira motel dela uste dutenak, beti itxoin behar dela erraten dutenak, edo sekula aurrezpenen kalkulua egin ez dutenak. »

TXIKen rola jokatzen duen Adèle Tousignant aktoreak aitortzen du ez duela bere izaera bortxatu behar izan pertsonaia antzezteko. « Lagun batek erran zidan: egin behar zenuke, zu zarela iduri du», dio irriz. « Esperientzia oso profesional eta dibertigarriaz » harago, filmaketak oihartzun berezia izan du aktore gaztearentzat, haur baten ama baita. « Garrantzitsua iruditzen zait gure planetaren geroarentzat jendea mugikortasun garbiago baterantz bultzatzea. Saiatu ondoan, ohartzen gara ez dela batere pentsatzen dugun bezain konplexua. »