Ipar Euskal Herriko bereizketa-gidaorriak
Dokumentua kontsultatu
Ene hondakinak bereizten ditut, bereizte aginduak
Hondakinak zein zikinontzitan bota behar diren jakitea ez da beti begi bistakoa. Bereizketa hobe egin dezazun gomendio praktiko batzuk ematen dizkizugu hemen.
Eguneratzea:2024(e) ko urriaren 31a
Zergatik zure hondakinak bereizi?
- Bereizketarik gabe birziklatzerik ez! Bereizketa, gure hondakinak behar den bezala birziklatu ahal izateko aldez aitzineko baldintza saihestezina da.
- Gure hondakinei bigarren bizi bat emanez, zolako lehengai berrien erauzketa mugatzen duzu eta ingurumenean duzun inpaktua apaltzen.
- Birziklatzearen eta berrerabilpenaren alde lan egiten duten enpresa eta elkarteen enplegu eta lana sustatzen duzu;
- Hondakinak bereizteak tratatu beharreko hondakin kantitatea apaltzen du eta, beraz, bilketaren kostua ere.
Bereizi aitzin gogoan izatekoa!
- Hondakin onena ekoizten ez duguna da. Bereizketa praktikak hobetzea, kontsumitzeko moldeez hausnartzea da lehenbizi. Hemen zure hondakinak jatorrian nola gutitu eta Zero hondakinerako bidea nola hartu esplikatzen dizugu;
- Ipar Euskal Herri guzian bereizketa sinplifikatzen da. Egun, plastikazko, metalezko, kartoizko edo paperezko estalki guziak leku berera doaz: ontzi edo edukiontzi horia;
- Kontsumitzen ditugun produktu guziak ez dira bortxaz birziklatzen. Dendan produktu bat erosi aitzin estalkian begiratu, piktograma batek produktua birziklagarria den adierazten du. Errazki birziklatuko direnak hauta itzazu, ekai bakarrekoak adibidez, eta gainestalkiak saihestu;
- Hondakin berezi anitzek ez dute gure zikinontzietan bukatu behar. Pilak, etxetresna elektrikoak, landare-hondakinak, ehunak, kartoi handiak,... hondakindegira edo bilketa berezirako guneetara eraman behar dira.
Zein hondakin zein zikinontzitan bota?
- Etxe-hondakinen ontzi/edukiontziak
- Estalki eta paperentzako ontzi/edukiontziak
- Berina edukiontziak
- Konpostagailua
- Ehunentzako edukiontziak
- Hondakindegian
- Farmazian
- Sail berezituetan
Etxe-hondakinen ontzi/edukiontziak
Hartan zer bota zenezake
Etxe-hondakin errefusa guziak: higiene hondakinak (mokanesak, xatarrak, maskak, komuneko papera), plastikazko objektu ttipiak (bolaluma, bizar labana, hortz eskuila), baxera hautsia.
Zer ez duzun hartan bota behar
- Birzikla daitezkeen hondakin guziak, ontzi edo edukiontzi desberdinetan bereiztekoak;
- Hondakin lanjerosak edo hondakin bereziak (hostoak, pilak eta bateriak, tresna elektriko ttipiak, erradiografiak, etab.), hondakindegira edo bilketa berezirako guneetara eraman behar dira.
Jakitekoa!
- Etxe-hondakinak ongi hetsiriko zikin-poltsa batean bildu behar dira;
- Zure janari hondakinei dagokienez, konpostatzea gogoan izan.
- Zure jantziei dagokienez, egoera onean baldin badira ematea pentsa ezazu edo ehun edukiontzian sar itzazu.
Hurbil dituzun bereizketa guneak atzeman itzazu
Estalki eta paperentzako ontzi/edukiontziak
Hartan zer bota zenezake
- Plastikozko estalki guziak
Adibidez: Plastikozko zakuak, izoztu barazkien zakuak, xehaturiko gasna zakutxoak, plastikozko gainestalkiak, botila paketeak, xaboi kargak, hortzetako pasta hodiak, krema poteak, jogurt poteak, polistirenozko ontzixkak, estalkidun plastikozko ontzixkak, gurin ontzixkak, arroltze ontziak, kruska patata paketeak, urdaiazpiko estalkia, izoztu jakien estalkiak, ogitartekoen estalkiak, botilak, flaskoak; etab. - Metalezko estalki guziak
Adibidez: Kanetak, altzairuzko kontserba-ontziak, aerosol flaskoak, metalezko botilak, metalezko ontzixkak, kafe paketeak, konpota estalkiak, kafe / te kapsulak, aluminiozko papera, botila tapa eta kapsulak, abisa tapoiak, ontzi estalkiak, kosmetika poteak, aluminiozko hodiak, metalezko krema hodiak, hutsak diren sendagai plaketak, etab. - Paperezko eta kartoizko estalki guziak
Adibidez: Kartoia, pizza kartoiak, kartoizko gainestalkiak, esne edo jus brikak, paper xurgatzaile eta komuneko paper bilkaria, bulegoko papera, egunkariak, iragarki orriak; gutun azalak, paperezko zakuak, etab.
Zer ez duzun hartan bota behar
Berina, janari hondakinak, mokanesak, komuneko papera, xatarrak, maskak, jantziak, hostoak, pilak eta bateriak, tresna elektriko ttipiak;
Jakitekoa!
- Estalkiak nahas-mahas sar itzazu ontzian, ez itzazu plastikozko zaku batean sar;
- Kartoiak toles itzazu zure ontzian leku gehiago ukateko;
- Estalkien edukia hustu ezazu;
- Estalkiakez bata bestearen barnean sar:
- Ez garbitu estalkiak
Hurbil dituzun bereizketa guneak atzeman itzazu
Berina edukiontziak
Hartan zer bota zenezake
Berinazko estalki guziak: Botilak, ontziak, poteak, usain on flaskoak, hutsak diren farmazia flaskoak.
Zer ez duzun hartan bota behar
- Metalezko estalki eta kapsulak, ontzi/edukiontzi horian botatzekoak;
- Anpoilak, baxerak, ispiluak, lore poteak, hondakindegira eramatekoak.
Jakitekoa!
- Auzoak gogoan izan, berina 7ak eta 21ak artean bota;
- Berina mugagabe birzikla daiteke baina bota aitzin bigarren bizi bat ere ematen ahal diogu.
Hurbil dituzun berina zutabeak atzeman itzazu
Konpostagailua
Hartan zer bota zenezake
Bio-hondakinak (fruitu eta barazki zurikinak, kafe hondakina...) eta landare ekaiak (hosto hilak, adar xehatuak, errauts hotzak, arkatza gordin marroia...).
Zer ez duzun hartan bota behar
Haragi eta arrain soberakinak, itsaski oskolak, belar txarrak eta eri diren landareak, tratamendu kimikoa pairatu duten baratzeko hondakinak, errautsa, abere gorotzak, biodegradagarria ez den oro.
Jakitekoa!
Ez duzu baratze bat ukan beharrik zure hondakinak konpostatzeko. Hemen zure konposta ongi egiteko aterabideak aurkezten dizkizugu.
Ehunentzako edukiontziak
Hartan zer bota zenezake
Jantziak, etxe oihalak, zapatak.
Zer ez duzun hartan bota behar
Ehun heze edo zikinak.
Jakitekoa!
- Ehun guziak sar daitezke, erabiliak eta andeatuak ere;
- Garbiak eta idorrak direla zaku baten barnean egon behar dute eta zapatak pareka lotuak.
Hurbil dituzun ehunentzako edukiontziak atzeman
Hondakindegian
Hartan zer bota zenezake
Hondakin bereziak: trabagarriak, kartoi handiak, hondakin elektriko eta elektronikoak, landare-hondakinak, obra-hondakinak, egurra, burdineria, erradiografiak, ehunak, baratze-hondakinak, pilak, bateriak, infekzio arriskuko arta hondakinak, hondakin lanjerosak.
Zer ez duzun hartan bota behar
Amiantoa edo amiantoa duten hondakinak, gas botila eta su-itzalgailuak, kutsaturiko egurra (termitak), motzondoak, sendagaiak, lehergailu eta arma kartutxoak, profesionalen hondakinak (salbuespenak izan ezik).
Jakitekoa!
- Onartuak diren hondakin motak hondakindegiaren arabera aldatzen dira (eremu bakoitzeko fitxa begiratu);
- Zure objektua hondakindegian bota aitzin dohaintza gogoan izan.
Hurbileko hondakindegia atzeman
Farmazian
Hara zer eraman zenezake
Epemugaz kanpoko eta baliatzen ez diren sendagaiak.
Jakitekoa!
Estalkiak eta jarraibideak zikinontzi horian utz daitezke.
Sail berezituetan
Hustea baimentzen dizutenak
Hondakindegian onartzen ez diren hondakin guziak (adibidez: gas botilak, produktu lehergarriak, produktu erradioaktibo edo amiantodunak, profesionalen hondakin bereziak)
Jakitekoa!
Euskal Elkargoak hondakin profesionalen bilketa eta tratamenduan berezituak diren enpresen koordenatuak dituzten informazio gidak eskaintzen ditu.
Gidatzeko informazio eta zerbitzuak
“Bereizketaren gida” aplikazioa
Citeok garaturiko “Bereizketaren gida” aplikazioak bereizketa jestu ona egiten laguntzen zaitu, gogoan dituzun galdera praktiko guziei erantzunez. Gaurdanik estalkien barra kodea eskaneatzea ahalbidetzen dizu, produktu/marka partzuer bakoitzaren bereizketa agindua emateko gisan.
Bereizketaren gida aplikazioa telekargatu
Oharra: aplikazioa ez da pantaila irakurle gisako laguntza teknologikoko sistemekin bateragarria.
Ipar Euskal Herriko bereizketa-memoak
Bereizketa memoek Ipar Euskal Herriko hondakin bereizketaren oinarrizko arauak oroitarazten dituzte eta zure etxetik hurbil diren bilketa zerbitzuen kontaktuak ematen dizkizute.
Hondakinen Murrizketa eta Bereizketarako Animatzaileak (H.M.B.A., fr. A.R.T.D.)
HMBAek zure hondakinak bereizteko eta jatorrian murrizteko gomendio praktikoak ematen dizkizute.
Ba ote zenekien?
2023ko urtarrilean bereizketaren sinplifikatzea plantan ezarri zenetik, urte batean biltzen diren estalki bereizgarrien bolumena %27 emendatu da Ipar Euskal Herrian. Hori biztanleko 11 kg gehigarriren baliokidea da.
Elkargoak hondakinen murrizketa eta birziklatzerako zer egiten duen deskubritu ezazu
Zerbait ments zaizu?