Ostreopsis alga

Ostreopsis, zer da ?

Ostreopsis begi hutsez ikusezina den mikroalga da; teorian, ur bero eta lasaietan ugaritzen da, itsasbazter arrokatsuetatik hurbil. 2021eko udan, euskal kostaldean azkarki agertu zen.  

Ostreopsis kontzentrazioa handia delarik, meta ttipi ala handiagoak ager daitezke, kolore ilunekoak eta gelatinatsuak, ur-azalean, arroketan ala makro-algetan. Bi espezie daude euskal itsasbazterrean:  

• Ostreopsis cf siamensis ;
• Ostreopsis cf ovata. Azken andui hori da jendeentzat toxikoa.

Ostreopsis-ek ekoizten dituen toxinak itsas langarretan zabaltzen dira; beraz, bainatzaileei kalte egin diezaiekete, baita itsas bazterrean dauden jendeei ere.

Zein dira arriskuak osagarriarentzat?

Bainatuz ala itsas langarrak arnastuz ostreopsisak hunkitu dituzten pertsonek sintoma gehienetan arinak ukan ditzakete; adibidez:

• eztula edo zintzurreko mina;
• mukia eta malkoak;
• sudurretik odola;
• hats hartzeko traba;
• sukarra, dardara eta giharretako mina;
• buruko mina, gohaindura;
• larruko jauzteak.

Sintoma horiek esposizioaren ondotik 6 oren ingurura agertzen dira, esposizioa laburra izanik ere, eta gehienetan 3 edo 4 egunen buruan desagertzen dira, konplikaziorik gabe.

Oharra: Ostreopsisekiko esposizioa erregularra baldin bada, sintomen kopurua eta iraupena handitu daitezke.

Nola jokatu?

• Hondartzatik itzultzean, dutxatu (gorputza eta ilea);
• Arrantzan aritu ondotik, hobe da edozein arrain jan aitzin hustea (ttipiak ere), eta eremu horretako beste itsaskiak (moluskuak, oskoldunak) ez jatea;
• Kontzentrazioa handia baldin bada, pertsona ahulek (belarri-sudur-zintzurretako edo biriketako arazoak ukanak dituztenek - asma, bronkitis kronikoa, alergiak, gaitz kardiobaskularrak - hipertentsioa, arritmia, buruko odol kolpea – diabetesa, etab. dutenek) ez dute hondartzan ez inguruetan ibili behar;
• Horri lotuak diruditen sintomak dituzten pertsonek (hats hartzeko traba handia, giharretako min eta dardarak luzaz) medikuarengana joan behar dute, eta Ostreopsisekiko esposizioa ukan dutela zehaztu. 15 zentroak (SAMU) hil ala biziko larrialdietarako baizik ez dira deitu behar. Ezohiko sintomak agertuz gero, Akitania Berriko ARS eskualdeko osagarri agentziako osagarri zaintza eta larrialdietarako plataformara jo daiteke, telefonoz (0 809 400 004) edo e-postaz: ars33-alerte@ars.sante.fr. Sintoma larriak agertuz gero, pozoiduren aurkako zentroa dei daiteke, 05 56 96 40 80 zenbakira.
• Lanaren arloko esposizioari lotuak diruditen sintomak agertzen baldin bazaizkie, itsasbazterrean ari diren langileek Laneko Osagarri zerbitzura jo behar dute. Langileak baldin badira, lan istripu aitorpena egin dezakete, erien asurantzaren bitartez. Jarraibideak hemen dituzu (FR): Service public webgunea.

Zer segimendu sistema baliatzen da? 

Ez dago Ostreopsisen toxikotasunari buruzko arauzko mugarik, itsasoko kutsagarri batzuentzat ez bezala (Escherichia coli, enterococcusak, etab.). Haatik, euskal kostaldean zaintza dispositiboa martxan da, urte osoan. ANSES erakundearen aholkuen araberakoa da.

Dispositiboa honela antolatua da:

• Urte osoan, hilabetero laginak hartzen dira, data finkoetan, 4 hondartzatan: Biarritzeko Portu Zaharra, Bidarteko Parlementia, Donibane Lohizuneko Erromardi eta Hendaiako Ondarraitz;
• Uda garaian (ekainaren 15etik irailaren 15era), astean bi aldiz hartzen dira laginak, data finkoetan, 5 hondartzatan: Biarritzeko Portu Zaharra, Bidarteko Parlementia, Getariako Zenitz, Donibane Lohizuneko Erromardi eta Hendaiako Ondarraitz;
• Neurtzen diren kontzentrazioen arabera, lagin hartze kopurua egokitzen da. Hiru arreta maila daude, behereko taulan azaldu bezala. 

Zer analisi mota egiten da? 

 Bi analisi mota egiten dira:  

• mikroskopioko analisia, zelula kopurua neurtzeko;
• PCR molekula-analisia, espezie bakoitzaren proportzioa neurtzeko (Ostreopsis cf ovata eta Ostreopsis cf siamensis).

Oharra: Analisi horiek inkubazio epea behar dutenez, emaitzak 24 orenen buruan eskura daitezke.

Analisien emaitza eta neurketa datu guziak partaideei etengabe helarazten zaizkie eta eskuratu arau orri honetan zabaltzen dira (FR). 

Nola eskuratu abisua? 

Ostreopsis kontzentrazio handia baldin bada, osagarri autoritateek (ARS) informazio mezuak hedatzen dituzte, haiek baitira eskumena duten bakarrak.  

Euskal Hirigune Elkargoak aholkuak argitaratu arau zabaltzen ditu:

• Kalilo aplikazioan, hondartza bakoitzean piktograma bat agertzen da, arreta maila ertaina (alga, hiruki hori batez inguratua) edo arreta maila handia (alga, hiruki gorri batez inguratua) delarik;
• sokorri guneetan, euskal kostaldeko hondartza guzietan.

Kalilo aplikazioa urririk telekarga dezakezu Play Store eta App Store plataformetan. 
Oharra: Kalilo aplikazioa ez da pantaila irakurgailuen gisako laguntza sistemekin bateragarria. Helgarritasun arazorik baldin baduzu, idatz helbide honetara: accessibilitecommunaute-paysbasquefr.