A Mendionde, la fèrma legumaira Garro qu'estòca la ploja entà irrigar los sons legumes
Aqueth bacin navèth d'estocatge de 3 000 m³ que permet a la cooperativa legumaira Garro de s'afranquir de l'aiga bevedera entà irrigar los sons hruts e legumes bio. L'obratge qu'ei estat inaugurat aqueth dimars 23 de junh en preséncia de Hervé Damestoy, purmèr cònsol de Mendionde e vicepresident de la Comunautat d'aglomeracion País Basco ne carga de l'Agricultura, Argitxu Ithourria, directora de la SCIC Garro, e de Véronique Mabrut, directora de la delegacion Ador e Costèrs a l'Agéncia de l'Aiga Ador Garona.
Actualizat lo : 23 June 2026
Despuish quinze ans, la Societat Cooperativa d'Interès Collectiu (SCIC) Garro que cultiva 9 ectaras en ortalatge bio sus las tèrras comunaus de Mendionde. La cooperativa que produseish 130 tonas de legumes, 10 tonas de hruts e 350 000 plants per an, hornits a nau fèrmes vesias. Dinc ací, tota l'irrigacion que dependè de l'aiga deu hialat public - dab ua factura podent aténher 8 500 euros per an, sia près de 5 % de la chifra d'ahars de la bòrda. La sequèra de 2022 qu'avèva agravat la situacion : restriccions d'irrigacion impausadas, pèrtas de recòlta, factura ne hauça. La cooperativa qu'a decidit d'investir.
Captar l'ivèrn entà irrigar l'estiu
La bòrda dispausa d'un hialat de varats qui collècta las aigas de ploja coladís de las sèrras e deu bastiment agricòla. Que son aqueras aigas - 1 400 mm que tomban cada annada suu sector, sustot en ivèrn e a la prima - qui alimentan d'ara enlà lo bacin navèth qu'estanca, shens nat horadatge dens la capa freatica. Pompèu a la demanda en estiu, aquera resèrva de 3 000 m³ que cobreish l'essenciau deus besonhs annaus de la bòrda, estimats enter 4 000 e 5 000 m³. L'aiga bevedera que demora reservada aus sols usatges sanitaris, com lo lavatge deus legumes.
Un finançament partenarial
L'investiment entad aqueth bacin d'estocatge que's lhèva a 100 000 euros, pres en carga a 60 % per l'Agéncia de l'Aiga Ador Garona, a 20 % per la CAPB dens l'encastre deu son dispositiu ErrekAgri e a 20 % per la SCIC Garro era medisha. La Comunautat País Basco qu'ei membre accionari de la cooperativa despuish las soas debutas e que pòrta ua partida deus sons investiments estructurants per un balh emfiteutic dab la comuna de Mendionde.
Un modèle entà la cordèra legumaira
Entà la Comunautat d'aglomeracion, sostiéner la cordèra legumaira bio, qu'ei tanben ajudar las bòrdas a s'adaptar au cambiament climatic e a securizar lo lor accès a l'aiga. Dab un estiu 2026 qui s'anóncia sec, lo bacin de Garro qu'ei uei plen au tèrç e qu'irriga dejà las culturas en plea sason . A travèrs ErrekAgri, que son dejà 58 projèctes qui son estats acompanhats suu territòri, entà près de 250 000 euros engatjats.
