Au còr de la pastorau junior de Chéraute
Au marge de la pastorau Lurdes Iriondo organizada a Chéraute a la fin de julhet, l'escòla publica bilingua Gaztelaia que balha vita a la soa mini pastorau Bi ama alhaba askatü nahian. Despuish març, ua centena d'escolans que repeteishen, urós d'aunorar la memòria de duas resistentas. Lo hrut deu lor tribalh que serà desvelat lo 26 de junh, a Chéraute.
Actualizat lo : 10 June 2026
En fin de matiada aqueth divés 29 de mai, la cort de l'escòla Gaztelaia de Chéraute que s'anima deus aires d'ua pastorau. Au centre, Bettan Jonet de l'associacion Berritza, que balha las consignas scenicas a mei d'ua seishantena d'escolans, alternant dab alegria souletin e francés. « Be nse demora un mes abans l'espectacle ! Qu'ei plan, mes que cau contunhar. L'important, qu'ei de gardar las linhas ! » ce lança aus actors d'aquera pastorau junior Bi ama alhaba askatü nahian, qui serà balhada a Chéraute lo 26 de junh, quasi un mes abans la deus lors ainats.
Ua centena de mainatges vaduts actors
Despuish març, « quan lo temps ac permet », las repeticions setmanèras que segueishen un medish rituau . La centena d'escolans atjats de 3 a 11 ans, vienuts de Chéraute-Hoquy, Moncayolle, Sent Blasi, Roquiague e Berrogain-Laruntz, que's retròban per rotlament entà afinar cants e pas pròpis ad aqueth teatre tradicionau de plen aire.
Aqueth dia, Bixente, Hugo, Lorea, Joañe, Sarah, Louis, qu'an a còr de balhar vita ad aquera istòria raperant lo passat de hemnas ordinàrias « extraordinàrias ». « Entà causir los personatges d'aquera pastorau, la nosta equipa educativa que s'ei sustot apressada de Robert Elissondo, professor deu licèu de Chéraute », qu'indica la directora Pantxika Etcheber-Urruty.
Mentre que la pastorau deus adultes que narrarà la vita de la cantaira engatjada Lurdes Iriondo, la deus mainatges que meterà en lutz Marie e Marie-Louise La Sèrra, ua mair e la soa hilha, resistentas.
Despuish la lor ostaleria de l'Espitau-Sent Blasi, que hasèvan lo ligam enter los vilatgés e los maquisards. Lo 27 de junh de 1944, que son arrestadas per las tropas d'aucupacion e enviadas dens los tristament celèbres camps de Ravensbrück e Sachsenhausen, d'on, per bonaür, que tornaràn .
Ua aventura collectiva
Los mainatges que son estats « tocats » per la lor istòria pendent ua jornada immersiva passada au còr d'aqueth vilatge. « Elles que son estadas capturadas e enviadas en deportacion, constrenta aus tribalhs forçats ! », que s'esmau Louis . A onze ans, Kattalin qu'ei urosa d'aunorar « aqueras daunas qui an hèit deu ben a l'entorn d'eras ». Quan Lucas, aute mainatge de Chéraute, que sabora d'apréner l'istòria de Sola, quan los còdis d'ua pastorau.
Lo lor estrambòrd qu'ei sincèr . Que sufitz de'us véder entonar los cants de grop, integrats a l'espectacle per Soizic Pineau de l'Escòla de musica de Sola : Ama, dens la version d'Etxahun Iruri e la de Mikel Laboa, o enqüèra lo cant Hala ere de Lurdes Iriondo.
La mesa en scèna qu'ei signada per Berritza . Lo tèxte per Julien Lucuix, l'un deus ensenhaires bascofònes, lo quau s'ei inspirat de las recèrcas de Robert Elissondo, de l'associacion Ikerzaleak de Maulion.
Qu'a tienut « a méter endavant revindicacions feministas e la luta contra lo fascisme, entà har lo ligam dab la pastorau Lurdes Iriondo de las sòrs Casamayou-Elkegarai ».
Los autes ensenhaires que son egaument partida - Amaia, Oihana, Elena, Pantxika, Maritxu, Sophie -, com los vilatgés, los parents...
« Quauquas repeticions que haràn enqüèra besonh abans lo 26 de junh », qu'arridolè Bettan . Mes l'errejent (l'empontaire) que's ditz dejà urós de l'implicacion deus mainatges : « Que vòli que prengan plaser a cantar en souletin, a s'inscríver dens los pas deus lors ainats, e sustot, qui sian fièrs d'eths. »
Lo 26 de junh, la lor pastorau junior que serà balhada en dus temps : lo matin a las escòlas de Sola, lo vrèspe, aus parents e personalitats deu vilatge. Un mes abans que la pastorau Lurdes Iriondo n'enflame pas Chéraute, las 19, 24 e 26 de julhet.