Campionas : portrèit d'ua generacion navèra d'esportivas bascas plea de talents
Qu'an enter 12 e 23 ans e excellent dens la lor disciplina. En sauvament costèr, pelòta, tenís, esquèit, aviron o handbal, aqueths atlètas joens que pòrtan haut las colors de País Basco ! Ua escaduda qui tien en dus mots : passion e disciplina.
Actualizat lo : 7 November 2025
Annah Abravanel, 22 ans - Campiona deu monde de beachflag
« lo haut nivèu, qu'ei 24h/24 ! »
A 22 ans, Annah Abravanel qu'ei dejà ua referéncia deu beachflag, ua espròva de sauvament costèr qui consisteish a recuperar un drapèu suu sable lo mei lèu possible. De las soas debutas au club Belharra de Sent Joan de Lutz, l'atlèta basca d'ara enlà licenciada a la Biàrritz Sauvament Costèr (BSC) qu'a coneishut ua ascension fulguranta . Dejà campiona deu Monde senior, qu'a emportat l'an passat lo campionat d'Austràlia, dus espleits jamei realizats per un o un europèu abans era !
Marie Goyenetche, 22 ans - Campiona de França de pala e frontball
« Que soi ua rotina plan en plaça »
Marie Goyenetche que descobreish la pelòta a cinc ans . Que practica purmèr la pala abans de s'ensajar au frontball, un derivat de la man nuda qui's jòga dab ua bala plegadissa. A 22 ans, qu'ei campiona de França senior en pala plea e vicecampiona de França en frontball. La Senpetar que s'entraina a la sala d'espòrts Kinka on tribalha en parallèla. Que mira lo doblat aus vienents Mondiaus dens las duas disciplinas devath las colors deu Sent-Pée Union Club.
Clémence Schneider, 12 ans - Doble campiona de Novèla Aquitània de tenís
« Sia que ganhi, sia b'apreni !»
Clémence Schneider b'ei ua jogadora de tenís prometedissa ! A 12 ans, qu'ei dejà dobla campiona de Novèla Aquitània e qu'a emportat aquera annada lo son prumèr tornei suu circuit europèu, en Bòsnia. Seguida per la federacion nacionau, que s'entraina 17h per setmana au club de la Biàrritz Olimpica. Ua disciplina obligatòria entà aténher lo son saunei : jogar un dia a Roland Garros !
Salomé Harpages, 15 ans - Campiona de França de street esquèit U17
« Que's cau purmèr amusar entà progressar »
Salomé Harpages qu'ei un talent precòç . A solament 15 ans, qu'ei campiona de França de street esquèit dens la categoria mensh de 17 ans. Ua proessa remarcabla entà la joena biarrote qui deu jonglar enter los entrainaments, las competicions e los cors au licèu. Dens lo club Lassoalai, qu'ei portada per l'emulacion creada dab las soas amigas skateuses.
Amaia e Maider Irazoqui, 19 ans - Multi medalhadas aus campionats de França d'aviron
« Que s'avança pas a pas ! »
N'ei pas ua mes duas palhetas que lo club d'aviron Ur Yoko de Sent Joan de Lutz qu'a l'astre d'entrainar. Amaia e Maider Irazoqui qu'an realizat un espleit istoric en çò deus juniors l'an passat dab tres podiums sus tres campionats de França diferents en aviron olimpic, aviron de mar e beach rowing. Metodics, las sòrs bessoas que basteishen lo lor projècte esportiu pas a pas dab l'ambicion de concórrer un dia aus JO.
Mailen Hontaas, 23 ans - Capitan de l'equipa prumèra de handbal de Tardets
« Ne dèishi pas jamei arren ! »
A 23 ans, Mailen Hontaas qu'ei la capitana navèra de l'equipa prumèra de handbal de Tardets. Ua justa recompensa entad aquera figura deu club qui a hèit totas las soas classas au Zibero. Uei en nacionau 2, la darrèr joen que voleré remontar au nivèu superior, com dus ans a, e que tempta d'insuflar a las soas parionas lo son estat d'esperit conquistaire.