Cap a ua edicion 2026 recòrd : la Passem qu'arribarà a Anglet après un trajècte de mei de 2000 km
Vaduda en 2018 dens los pas de la Korrika basca, la corsa en relai de la Passem! que s'impausa au briu deus ans com un rendètz-vos immancable entà tots los simpatizants de la lenga e de la cultura gascona. Aquera annada, lo periple long de mei de 2000 km que traversarà ueit territòris istorics de Gasconha abans d'arribar a Anglet lo 9 de mai vienent. Organizators e participants que hèn pròva de l'importància de sostiéner aquera grana chaine de solidaritats.
Actualizat lo : 13 April 2026
Après la Korrika basca, qu'ei ua auta corsa en relai solidària que s'aprèsta a arcuélher País Basco, aqueth còp en sostien au gascon. Creada en 2018 per Ligams (NDRL : ua associacion de promocion de la lenga occitana-gascona), la Passem! que partirà lo 30 d'abriu vienent de Bedós, en vath d'Aspa, entà s'acabar 11 dias mei tard, a Anglet. Ua bocla longa de 2110 km qui traversarà ueit territòris istorics de Gasconha : Bearn, Bigòrra, Comenge, Gèrs, Òut e Garona, Gironda, Lanas e lo Baish-Ador.
Revelar los simpatizants passius
Calcada suu modèle de la soa omològa basca, aquera grana biannau esportiva e culturau que s'ei lèu impausada com un rendètz-vos immancable. L'ahuegament popular creishent a l'entorn de l'eveniment que revèla tot un monde d'elegits, d'enterpresas, de ciutadans qui son los nostes simpatizants passius e qui amuishan l'estacament ad aquera lenga e a la soa cultura
, nòta Gautier Lagalaye, Director de l'Ofici Public de la Lenga Occitana (OPLO), un gropament d'interès Estat-Regions cargat de desvolopar la practica de l'occitan, sustot per l'ensenhament. Associat a l'operacion despuish 2024, l'OPLO qu'i ved tanben un mejan eficaç entà suscitar navèras vocacions. Nombrosas son las personas suu trajècte qui'ns demandan com har entà s'i méter. Qu'ei entà respóner ad aqueth besonh recurrent qui avem creat, dab los nostes partenaris deu Cirdoc e deu Congrès «
Prèst entà l'òc, près de vòste
», ua basa de dadas, observatòri qui referéncia tots los lòcs d'ensenhament, de cultura, las animacions e ressorsas a l'entorn de l'occitan.
Un gran espectacle entà l'arribada deus corredors
Era tanben qu’es ua fervorosa suportaira de la causa gascona e ua abituada de la Passem!. Musiciana professionau, au cap deu trio polifonic charnègue Arraditz (rasics en gascon), Fanny Châtelain qu'a vist las causas en gran augan. Acompanhada sus l’empont per ua centena de musicians, dançaires e interprètes amators, qu'encoratjarà los darrèrs corredors sus la linha d'arribada dab un espectacle musicau « A tot Vedent » creat especiaument entà l'escadença. Har enténer la votz de l'occitan en tèrra basca qu'ei un dever entad aquera militanta engatjada qui rapèra ua realitat a còps desbrombada la de l'unitat culturau d'un territòri qui a mei de 1000 ans.
La joena tolosana, installada despuish quauquas annadas a Anglet, que plaideja sustot entà l'obertura de classas bilinguas gascon-francés dens las 14 comunas istoricament gasconofònas deu territòri.
Dens quauquas setmanas, lo relai que traversarà ueit d'aqueras localitats a Aussaranh-Arribarèita, Samas, Came, Bidaishe, Bardòs, Urt, Lo Bocau, Baiona e Anglet. Objectiu : har mélher que l'edicion de 2024 qui avèva permetut d'amassar près de 100 000 euros de dons. Los organizators que rapèran aus partenaris interessats qui's pòden engatjar multiplas faiçons en crompant un quilomètre, en ajudant a la logistica de la corruda, en sostienent dirèctament l'associacion Ligams o en imaginant formulas sus-mesura.
E ac sabetz ?
A cada relai, los corredors que's transmeten lo « ligam » (« ligam » en occitan) : un testimòni qui representa la transmission de la lenga e que contien un messatge secret qui ei revelat a l'arribada de la corruda.
Un mes tot en occitan a País Basco
Mantun temps-fòrt e rencontres en occitan gratuitas e dobèrtas a totes animaràn las setmanas venentas, abans l'arribada oficiala de la corsa lo 9 de mai venent a Anglet.
Lo dimars 7 d'abriu a 10h, ua lectura de conte e ua mediacion a l'entorn de l'istòria e de las tradicions gasconas a destinacion d'un public familiau qu'a lòc au Centre d'Interpretacion de l'Arquitectura e deu Patrimòni de la Vila de Baiona. L'eveniment qu'ei prepausat dens l'encastre de las festivitats deu centenari de l'Academia gascona Baiona Ador, ua estructura istorica engatjada despuish 1926 dens la promocion de la lenga e de la cultura gasconas en País basco.
Lo 7 d'abriu tostemps a 18h30, a la Mediatèca d'Urt, lo jornalista e especialista de las questions de plurilingüisme Michel Feltin-Palas que tien ua conferéncia suu tèma « Çò qu'arrés ne vs'a pas jamei dit sus las lengas regionaus. » Un escambi condusit en quizz entà n'apréner mei sus l'occitan en s'amusant.
Lo 14 d'abriu a 16h, a la Jasença Bourthaïre a Aranco, la companhia Musiquejam que prepausa aus mainatges autanlèu un an un espectacle de 20 minutes tot en occitan-gascon. « l'ueu, de qui ei ? » (L'ueu, a qui apartien ?) que conta la quista de duas hemnas entà retrobar l'origina misteriosa d'un ueu.
Lo 2 de mai de 10h a 12h a la Maison comuna de Baiona, lo Centre de Formacion Professionau en Lenga e Cultura Occitanas qu'anima un talhèr d'iniciacion a la lenga occitana gascona, obèrt e accessible a tots los publics. L'escadença de discutir en grop, de partatjar los sons soviéners, istòrias e tradicions gasconas e d'enriquir lo son vocabulari.