Contracte Locau de Santat País Basco : tres ans d'accions
Tres ans après la signatura deu Contracte Locau de Santat (CLS) País Basco, mei de 100 actors que's son amassats lo 17 d'abriu a casa de las associacions de Baiona entà dreçar un bilanç intermediari ric en ensenhaments. Aqueth temps hòrt qu'a permetut de presentar los resultats de las accions miadas e deus projèctes finançats peu fons de sostien santat, abondat a parts egaus per la Comunautat País Basco e l'Agéncia Regionau de Santat (ARS).
Actualizat lo : 22 April 2025
Lo CLS, atruna partenarial au servici de las politicas publicas de santat, qu'a permetut d'impulsar dinamicas locaus a l'entorn de quate èishs màgers : encoratjar comportaments favorables a la santat (laboratòri de las conduitas a riscs en çò deus adolescents, prescripcion d'exercici fisic, promocion deus depistatges de càncers), ahortir l'accès aus suenhs entà tots (sostien aus ostaus de santat, acompanhament handicap e perinatalitat, suenhs oncologiques de supòrt), agir suus mieis de vita (sensibilizacion a la pollucion atmosferica e a la qualitat de las aigas de banhada), e ahortir los ligams de proximitat (prevencion de las violéncias en çò deus joens, inclusion per la cultura).
Au demiei de las iniciativas sostienudas, lo projècte « lo Cafecito que hè lo son espectacle » de l'associacion Elkarlana Lagunak que's distingueish . Aqueth projècte, cofinancé peu fons de sostien CLS, que prepausa dus còps per mes deus talhèrs de cant e de teatre animats per artistas, entà favorizar l'inclusion de las personas en sofriment psiquic. L'objectiu : provocar l'encontre, copar l'isolament e multiplicar las palancas d'inclusion gràcias a la cultura. Los talhèrs qu'an permetut a participants de « repréner vita » segon los lors mots e de s'investir dens la creacion d'un espectacle previst lo 14 de junh a la Luna Negra.
Aute projècte emblematic : la creacion d'un escape game francés-euskara sus la prevencion de las violéncias, desplegat au près deus liceans e futurs professionaus de santat.