Cor d'estiu transfrontalèrs 2025 : las inscripcions be son obèrtas !

Dens la continuitat de las tres edicions precedentas, los Cors d'estiu transfrontalèrs qu'auràn lòc a Baiona deu 30 de junh au 4 de julhet de 2025. Los subjèctes abordats dens aquera edicion que seràn ligats a la comunicacion, au dret, a l'economia e a l'enterpresa, a la lingüistica e a la literatura, atau com a la societat, dens un apròchi transfrontalèr.

Aqueths cors d'estiu que s'adreçan aus abitants e ciutadans dab entà objectiu de har vededer e accessible la coneishença scientifica produsida peus universitaris de País Basco Nòrd e Sud.

Ua programacion rica e diversificada

Nau cors que son prepausats aquera annada, abordant subjèctes variats en ligam dab la societat, lo dret, la lingüistica, la literatura, la comunicacion o enqüèra l'economia. Aqueras formacions, animadas per expèrts deu monde universitari, qu'illustran la volontat de har dialogar las disciplinas au servici de la compreneson deus enjòcs comuns ad aqueth espaci transfrontalèr.

Au programa sustot :

• Ua conferéncia d'obertura sus las perspectivas auhèrtas per l'espaci europèu de las dadas de santat entaus suenhs e la recèrca transfrontalèra.
• Ua reflexion sus la contribucion deus territòris ruraus au benestar globau.
• Un focus sus las politicas lingüisticas e educativas favorizant l'inclusion de las personas migrantas.
• Ua analisi deu navèth Pacte europèu sus la migracion e l'asile, dab un esclairatge sus las soas implicacions a las frontèras.
• Un estudi deus desfís ligats a la gestion toristica a l'escala transnacionau.
• Ua exploracion deus ligams enter diversitat lingüistica, comunicacion numerica e estructuras de cooperacion transfrontalèra.
• Deus espiars crotzats sus l'identitat(s) basco(s) a l'orizont 2050, o enqüèra sus las lengas parladas locaument e los usatges especifics deu basco.
• Ua enquèsta sus l'engatjament politic e identitari deus activistas joens au País basco.
• Ua presentacion de l'Eusko e d'ua iniciativa de moneda locau transfrontalèra.

Un eveniment multilingüe e accessible

Los cors que seràn balhats en euskara, francés, espanhòu e anglés, valorizant atau lo multilingüisme. Qu'auràn lòc en presenciau, mes ua partida deu programa que poirà totun èste seguida en linha en dirècte. 

Las inscripcions, gratuitas, que son possiblas dinc a la debuta deus cors .

➡ Mei d'informacions e inscripcion sus : https://www.uik.avuts/fr/activites/que--programa-cors dete transfrontalèrs