Episòdi 1 - Setmana Klima 2026 : dètz dias entà descobrir e preservar la biodiversitat a País Basco
La Setmana Klima que torna deu 2 a l'11 d'octobre de 2026 entà la soa 6ᵉ edicion, plaçada devath lo signe de la biodiversitat. Passejadas, talhèrs, conferéncias, exposicions, espectacles e plan d'autes rendètz-vos que convidaràn petits e grans, pertot a País Basco, a descobrir la riquessa deu vivent e a compréner mélher lo son ròtle essenciau dens las nostas condicions de vita.
Actualizat lo : 2 October 2026
Quan se parla d'environament, que's pensa sovent a la reduccion de las emissions de gas d'efèit de sèrra. Mes un aute enjòc màger que miaça l'equilibri de la vita sus Tèrra : l'ahonida de la biodiversitat.
Qu'ei aqueth fenomèn qui la Comunautat d'Aglomeracion País Basco, los sons comuns membres e los sons partenaris qu'an causit de méter en lutz pendent aquera 6ᵉ edicion de la Setmana Klima, a l'entorn d'un messatge federator : « la biodiversitat : ua aliada de tostemps, essenciau entà l'aviéner deu noste territòri ! » La biodiversitat que designa l'ensemble de las espècias vivas -animaus, vegetaus e microscopicas-, los mieis naturaus dens los quaus evoluan e las interaccions qui'us religan. Aqueths ecosistèmas que contribuan sustot a la nosta alimentacion per la pollinizacion de las culturas, a la fertilitat deus sòus, a la qualitat de l'aiga e de l'aire, atau com a la nosta santat. La biodiversitat ne's resumeish pas donc pas a la natura qui ns'entorneja o aus paisatges qu'observam : b'ei indispensabla a la nosta vita !
Ua ahonida inedita, mensh 70 % d'insèctes en 20 ans
Pr'aquò, lo vivent que s'ahondra uei a un ritme inedit . Segon l'IPBES, un organe scientific intergovernamentau independent sovent escaissat lo « GIEC de la biodiversitat », près d'un milion d'espècias animaus e vegetaus que son miaçadas d'extincion . Tostemps segon aqueths expèrts, a l'escala mondiau, 75% deus mieis terrèstres que son estats significativament alterats per las activitats umanas. De nombrós estudis qu'an permetut tanben de méter chifras sus un declin de la biomassa deus insèctes volants en Euròpa de l'ordi de 70 % en vint ans. Mantun factor qu'explica aquera situacion : la destruccion e la fragmentacion deus abitats naturaus, sustot pr'amor de la desforestacion e de l'artificialisation deus sòus, las pollucions, la surexploitation de las ressorsas, las espècias exoticas envadissentas e lo desreglament climatic.
Près de 100 rendètz-vos a País Basco
L'objectiu de la Setmana Klima qu'ei de perméter a cadun de s'esmiraglar davant la diversitat de las espècias e deus paisatges qui ns'entornejan, de compréner mélher los servicis essenciaus tornats peus ecosistèmas naturaus e de descobrir de las solucions concrètas entà preservar e restaurar lo vivent. Près de 100 rendètz-vos que son prepausats dens l'ensemble de País Basco : passejadas botanicas, visitas de sites exemplars, talhèrs participatius, obradors natura, projeccions, conferéncias, exposicions e espectacles. Aquera programacion que s'adreça a tots los publics, petits e grans, e que convida cadun a observar, escambiar e agir, a la soa escala, en favor d'un territòri mei resilient. Retrobatz l'ensemble de la programacion de la Setmana Klima 2026 en linha e que partatjatz los vòstes còps de còr suus hialats sociaus dab lo hashtag #semaineklima2026