Episòdi 2 - Deus paquets de Nadau entà sostiéner las ikastolas e los productors de Sola

Dab los ikaskoli, qu'an trobat lo present ideau a méter devath l'avet. Cada annada, despuish mei de 20 ans, las duas ikastola de Chéraute e d'Alos que prepausan a Nadau deus cofrets descobèrta de produits locaus . hormatge, de las tisanas, de las pastas, de la carnsaladeria, deus shucs, de las confituras, de las còcas secas... « Qui bon !  Que valorizam unicament produccions artisanaus, locaus e de qualitat », precisa Argitxu Ourthiague, l'ua deus membres de la comission qui pòrta l'operacion.

Ua doble bona accion

L'iniciativa que remonta a la debuta de las annadas 2000. Entà se desvolopar, las ikastolas de Sola que cèrcan navèras rentradas d'argent . « las gents n'ac saben pas tostemps mes dens las nostas escòlas immersivas (ikastola), sols los professors que son pagats per l'Educacion Nacionau . Tota la rèsta - las assistentas mairaus, los agents d'entertien, lo materiau de classa, las sortidas escolaras, etc. - que depend de l'activitat benevòla . » Au demiei deus parents d'escolans o lo hialat pròche, hèra que tribalhan dens lo sector agricòla . Los ikaskoli, qu'ei l'assegurança de har ua doble bona accion, en sostienent au còp los paisans souletins e la lenga basca. Au briu de las annadas, ua maquineria plan rodada que's met en plaça . A cada rentrada escolara, lo burèu executiu d'ikaskoli que s'amassa entà imaginar lo contienut deus paquets. Entà agradar au mei gran nombre, los organizators qu'ensajan de s'adaptar a las diferentas demandas. « Que s'a lançat qu'i a drin de temps deus paquets shens carn, per exemple, o deus paquets unicament bio », que descriu Jean-Marc Cazanave, un aute membre de la comission. Un còp los cofrets definits, que son metuts en venta suu site Internet de l'operacion qui demora obèrt dinc a la fin de noveme.

Ua cadena grana de solidaritat

L'an passat, près de 2500 ikaskoli que son estats escorruts . Ua escaduda qui creishó drin mei cada annada. « Uei, lo dispositiu qu'ei plan calibrat cap aus nostes mejans, ne's poiré pas har hèra mei », que tempèran los organizators . Pr'amor que la confeccion e l'encaminament de las comandas que deu poder seguir darrèr. Entà enviar los presents en temps e en òra, las familhas de las duas ikastola que's retròban pendent tota ua jornada, quauquas setmanas abans la debuta de las hèstas. « Qu'ei un vertadèr maraton mes tanben un moment de convivialitat qui's partatja tots amassa. Aquò que'ns permet de crear ligams enter parents, d'apréner a nse conéisher mélher », qu'aprècia Argitxu Ourthiague . Cadun qu'a un pòst plan definit . Qu'i a los qui plean los paquets, los qui los embalan e los qui los anaràn liurar. Près de cent lòcs de retirament que son uei partenaris de l'operacion, ua majoritat au País Basco Sud d'on son passadas l'essenciau de las comandas. Tots que son benevòles, com Sebastian Aguer qui tien lo restaurant Zamaia a Baiona. Souletin eth tanben, qu'a rejunt lo movement quate ans a, per conviccion. « Que tròbi lo concèpte geniau, que son produits de qualitat qui ajudan en mei los mainatges de Sola. » Cada annada, que sèrv un vintenat de clients . « Que s'a un bon de comanda, que verifiqui simplament l'identitat de las personas . B'ei plan rapide ! »