Estrategia torisme País Basco : entà un torisme mesurat, respectuós deu territòri e deus sons abitants

A partir deu projècte de territòri adoptat en 2021, un vaste tribalh qu'a implicat l'ensemble deus actors deu torisme, los elegits, la societat civila e los abitants entà abotir a l'Estrategia Torisme de País Basco, adoptada lo 7 de deceme darrèr a l'unanimitat peus elegits deu Conselh comunautari. Jean-René Etchegaray qu'a saludat « aqueth exercici collectiu permetent de portar amassa l'ambicion d'un torisme respectuós deu territòri e deus sons abitants, qui mestria los sons impactes sus l'environament ».

La desmarcha qu'a permetut de definir collectivament un cambiament de cap au servici d'un modèle de torisme desirat peu territòri. Daniel Olçomendy qu'a soslinhat que « la politica toristica ne deu pas mei estar ua cordèra solament pensada peus actors deu torisme, ua cordèra èx-nihilo, mes com lo cairehorc de totas las politicas publicas. Que concerneish au còp la mobilitat, l'amainatjament, lo desvolopament economic, la gestion de l'aiga e de las dèishas, la valorizacion deus patrimònis culturaus e naturaus e lo transfrontalèr ».

Duas prioritats estrategicas en 2025

Aqueth document estrategic que balha un cap a la politica toristica a l'orizont 2040 e que s'engatja sus accions a miar a tèrmi cort. L'annada 2025 que serà sustot plaçada devath lo signe de duas accions prioritàrias e màgers entau territòri :

→ Gestion deus flux toristics : En seguit d'ua ajuda de 90 000 euros obtienuda per l'Aperet a Manifestacion d'Interès d'Atot França, de las experimentacions entà regular los flux que son miadas dinc au cap de l'annada 2025 : dispositius d'observacion e de regulacion de parcs d'estacionaments e autes sites hèra frequentats que son en cors en montanha, en vila o suu litorau.

→ Sostien aus bens comuns : Un dispositiu qu'acompanharà projèctes portats per agricultors o associacions environamentaus entà entertiéner, preservar e valorizar los bens comuns deu territòri qui son las lengas basca e gascona, lo paisatge, l'aiga e la biodiversitat.

Un torisme engatjat entau climat e la preservacion de las ressorsas

Lo sector deu torisme qu'ei au còp vulnerable aus efèits deu cambiament climatic e ua hont importanta d'emissions de gas d'efèit de sèrra. 8% de las emissions mondiaus e 11% emissions nacionaus que son dirèctament ligadas a l'activitat toristica . L'Estrategia Torisme País Basco que s'inscriu dens l'encastre deu Plan Climat País Basco e qu'enten acompanhar los actors dens la lor transicion environamentau, sustot gràcias a accions concrètas miadas en ligam dab las autas politicas publicas com :

• la mesa en plaça de critèris environamentaus entà l'autrei d'ajudas a l'aubergament
• la promocion de las mobilitats doças
• la gestion estauviaira de l'aiga per las hébergeurs
• la creacion d'un observatòri deu Torisme inter-politicas publicas
• la valorizacion deus produits locaus de qualitat

Un torisme pensat entà e dab los abitants

Los abitants de País Basco que son au còr d'aquera estrategia :

• Que son los prumèrs practicants de lésers e visitaires deu lor territòri, tota l'annada
• Qu'arcuelhen los toristas (1/3 deus lheits dits toristics de País Basco que son situats dens la familha o en çò d'amics)
• Que son dirèctament concernits peus impactes, positius com negatius, qui lo torisme e los lésers que pòden aver suu quadre de vita.

L'estrategia que promòu un torisme de proximitat e quate sasons pensat purmèr entaus sons abitants.
 

Un torisme plurilingüe e valorizant los patrimònis

L'estrategia Torisme de País Basco qu'aspira a despartir mélher los flux tot lo long de l'annada e sus l'ensemble deu territòri. Que s'apièja entà aquò suus visitaires de proximitat vienent deu País Basco sud, de Bearn e de Lanas e que valoriza las riquessas culturaus deu territòri, sustot lo plurilingüisme. accions cibladas que favorizan l'usatge de l'euskara e deu gascon, en encoratjant los abitants e visitaires a descobrir lo territòri per ua auhèrta culturau renovelada. accions que son estadas engatjadas entà repertoriar l'auhèrta, ahortir la traduccion deus supòrts de comunicacion e de las visitas, formar los personaus d'arcuelh.