Euskaraldia 2025 : 11 dias entà har víver la lenga basca au quotidian
La 4au edicion d'Euskaraldia que's debanarà deu 15 au 25 de mai vienents. Objectiu : cambiar las soas costumas entà parlar euskara en tota circonstància au quotidian.
Actualizat lo : 21 March 2025
A dus mes deu lançament de la quatau edicion d'Euskaraldia, los organizators e los representants de las institucions partenàrias d'Euskaraldia qu'èran amassats ger a Baiona . Aquera dinamica qui a per mira d'encoratjar un usatge acreishut de la lenga basca au quotidian, que's debanarà aquera annada deu 15 au 25 de mai. Pendent aqueth periòde, deus milèrs de participants per País Basco qu'aficharàn lo lor engatjament en quilhant un badge los identificant com "Ahobizi" (los qui s'engatjan a parlar en euskara autant que possible) o "Belarriprest" (los qui comprenen e qu'encoratjan a los parlar en basco).
Jean-René Etchegaray, president de la Comunautat d'Aglomeracion País Basco, qu'a soslinhat l'importància d'ahortir la practica quotidiana de la lenga : « Ahortir la soa practica quotidiana qu'ei ua prioritat . Dab Euskaraldia e las nostas accions a l'annada, que persegueishem un medish objectiu : ancorar durablament l'euskara dens tots los maines de la vita sociau. Aqueth desfís que deu estar relhevat collectivament en intensificant los nostes esfòrç. »
De las accions concrètas entà promòver la lenga
Antton Curutcharry, Vicepresident ne carga de la politica lingüistica basca e gascona, qu'a metut endavant las iniciativas concrètas metudas en plaça entà favorizar l'usatge de l'euskara : « Har euskara un pielar deu quotidian qu'ei ua necessitat . Qu'ageishem concrètament : arcuelh bilingüe dens las grépias, sostien a l'ensenhament e a la creacion artistica, aprendissatge entaus adultes per la borsa Euskaldundu, mes tanben supòrt a las comunas entà desvolopar los lors servicis en basco. Autant de lhevaders entà víver en euskara cada dia. »
Los participants que's pòden inscríver suu site oficiau entà recéber de las informacions suus talhèrs de preparacion e la distribucion deus badges. En s'implicant activament, cadun que pòt contribuar a ahortir la preséncia de l'euskara dens la vita vitanta e a perennizar lo son usatge au delà d'aquera iniciativa. Lo rendètz-vos qu'ei donc pres deu 15 au 25 de mai.