La 24au Korrika be's- lança de Tardets Sorholus lo 19 de març !

Lo 19 de març, los corredors de la Korrika, corsa-relai en favor de l'euskara, que's lançaràn de Tardets-Sorholus (Atharratze en basco) a 15h30. centenas de milèrs de participants, totas generacions confonudas, que's passaràn lo testimòni pendent dètz dias entà córrer vilas e vilatges bascos dinc a Bilbao, on l'arribada ei fixada lo 29 de març a 12h04. « Euskara que parquè » (« Qu'èm la lenga basca ») qu'ei l'eslogan retienut per AEK, l'associacion d'ensenhament deu basco aus adultes, entad aquera 24au edicion. Qu'amassarà petits e grans tot lo long d'aquera traversada deu País basco.

Promòver l'euskara e recoltar hons   

Cada dus ans, aquera corsa-relai que suscita l'ahuegament deus abitants deu País basco . « Que desiram qu'aquera edicion sia la mei participativa de totas, en tèrmes de testimònis e de personas mobilizadas », precisa Joana Parachu d'AEK Iparralde. Los objectius que demoran los medishs : « sensibilizar a l'euskara, promòver lo son aprendissatge e recoltar hons ».

Dens la practica, los participants – ciutadans, enterpresas, associacions, collectivitats, etc. – que crompan un o mantun quilomètre entà córrer. Los hons recoltats que son destinats a projèctes o actors engatjats entà l'euskara. Aquera annada, AEK qu'a causit d'ajudar l'iniciativa populara Errigora, qui sostien sustot las ikastolas (escòlas en lenga basca) deu sud de Navarra.

Tardets, tota ua istòria 

Com mei de quaranta ans a, en 1985 exactament, la vila de Tardets-Sorholus (Atharratze en basco) prèsta lo son decòr au lançament de la corsa-relai. Un eveniment esperat peus organizators e los abitants, qui veden atau la Hauta-Sola que met a l'aunor .

Despuish mantun mes, diferents actors que's preparan a l'eveniment . Dens l'encastre de la Korrika kültürala, deus membres de las associacions Berritza e Aitzindariak qu'an preparat l'espectacle Ko’rrika galà, presentat lo 13 de març dens la sala d'Alçay. L'espectacle que mesclarà deus cantaires e dançaires d'Aitzina Biga, Berritz’Hats, Gaztelüko Lagünak, Txingili’k, Müsikalde e Kantalots, atau com mainatges de las escòlas de dança de Sola.

Autas animacions que son previstas a la partença de la Korrika a Tardets mes tanben a Maulion : korrika ttipi, concèrts, repaish partatjat, gigants acompanhats peus gaiteros de Baigorri, exposicion au centre culturau Artetxe…

D'un aute costat, de las personalitats souletines qu'an participat a la cançon « Korrika Basabürütik abiatzen », sus paraulas d'Anna Iraola e deu grop Hiruak d'Alos-Sibas-Abense, e ua musica de Niko Etxart, atau com au clip realizat per Elsa Oliarj-Ines, originària de Tardets. A se passar en bocla abans la partença de la Korrika.