« la musica que'ns hè mei umans »

Autanlèu l'atge d'ueit ans, Abdellah que frequenta lo conservatòri Maurice Ravel a Baiona, on apren lo saxofòne e lo solfègi. Mes qu'ei sustot a lor que la musica pren tota la soa plaça. En çò deus Boujalal, que'ns desvelham cada dia au son de l'outar, que's canta a taula e que's dança dens los correders . La musica qu'ei pertot . La gaité e l'amor tanben. La soa mair, Dounia, ajuda-suenhanta a Baiona, que'u transmet la doçor e la fòrça de las soas rasics, mentre que lo son pair l'inícia a la musica tradicionau basca.

Portat peu sostien deus sons pròches, Abdellah que s'inscriu a The Voice Kids . Que passa totas las estapas deu concors e qu'atenh la finala, acabant a la dusau plaça dab 25,3 % deus vòtes. La soa prestacion, acompanhada peu son pair a l'oud, que mèrca los esperits per la soa autenticitat e la soa generositat. Un trajècte shens fauta entad aqueth cantaire autodidacte, shens formacion tecnica ni coachs vocaus. « Sus scèna, que ressenti ua energia unica, com si tot vadè possibla », ce explica. Aqueth passatge televisat que'u permet de tocar un large public e d'incarnar ua joenessa passionada e accessibla.

Entad aqueth apassionat de cosina a l'arridolet luminós, la musica qu'ei abans tot ua hont d'emocions e de partatge. « Entà jo, la musica qu'ei ua lenga universau . Qu'a ua influéncia pregonda sus las nostas emocions e que'ns hè mei umans », que hida Abdellah .

Un aviéner plen de promessas

Abdellah que contunha de traçar la soa rota, enter musica e navèths projèctes. Que neureish de beròjas ambicions artisticas e qu'a recentament rejunt lo casting de la seria « Tot entà la lutz », produsida per TF1 e Netflix, qui cabussa dens l'univèrs d'ua escòla de cant e de dança. « Qu'aimi l'idèa de transméter emocions, qui aqueth sia en cantant o en hant la comedia », ce afirma. Parallèlament, que persegueish los sons estudis de dret, entà, dilhèu, vàder jurista. « Que vòli mostrar que's pòt saunejar gran en gardant los pès sus tèrra », ce soslinha.

Abdellah Boujalal qu'incarna atau ua votz montanta, prèsta a har vibrar los còrs sus scèna com a l'ecran.

Aqueth article qu'ei tirat de la Revista País Basco n°8 de la Comunautat País Basco