La pèça coregrafica Maxka’roa presentada a Saint-Palais a la fin de noveme

« Qu'ei la fin de l'aventura e la darrèra escadença de descobrir l'espectacle Maxka’roa, co-produsit per l'associacion Berritza dab lo grop de dança Txingili’K », qu'eslissa lo dançaire e musician Pette Jaragoyhen. Las duas darrèras datas que seràn balhadas au cinèma de Saint-Palais, las 29 e 30 de noveme. « Un quadre ideau entà apreciar aqueth espectacle a véder de près », que rebombeish la dançaira Maider Arrossagaray . 

A la partença de l'aventura : l'enveja de l'equipa joena de Berritza de perseguir de las produccions d'espectacles, dens lo linhatge d'aqueths organizats peu passat : Baküna Espectacle o Üda Batez. Entà balhar vita ad aqueth projècte, l'equipa qu'a balhat carta blanca a Eneko Gil, joen coregrafe en vista d'Errenteria, e a la companhia souletine Txingili’K.

Un procediment de creacion portat dab los joens 

Lo procediment de creacion qu'ei estada « movent », elaborat dab los dançaires. « lo coregrafe que s'ei inspirat de l'univèrs de la mascarada e qu'a considerat las problematicas qui interèssan los joens souletins », qu'indica Pette . « Eneko Gil que ns'a sondats sus las nostas paurs e los nostes desirs, que persegueish Maider . Qu'avem hèit pròva de la nosta inquietud de cap au declin de la nosta lenga en Sola, a la manca de dròlles dens los grops de dança, au carestièr deus lotjaments. Qu'avem tanben parlat d'amor, d'estacament a la nosta cultura e a la nosta identitat souletines. » 

Lo rituau de las mascaradas que n'ei un pielar . Dens aqueth teatre popular tradicionau, dus mondes que s'opausan : lo sauvatge e lo civilizat, l'ordi e lo rambalh, los rois e los negres, lo ben e lo mau… Aquera dicotomia qu'ei estada lo punt de partença de l'istòria. « lo coregrafe n'a pas cercat d'associar dus estiles, tradicionau e contemporanèu. Qu'a volut perlongar lo movement, en creant un tresau estile. Que ns'entraina dens lo son monde, oniric », que persegueish Pette . Sus scèna, los dançaires dirigits per Eneko Gil e enquadrats per Catherine Arçanuthurry, que son acompanhats musicians Jeremy Garat e Oihan Oliarj-Ines, deus cantaires Jean-Louis e Pascale Bidabe Aramburu.   

Sus Maxka’roa, lo public ne's deu pas esperar a enténer la xirula, o véder los dançaires en costumes tradicionaus. La libertat de creacion qu'a prevalut dinc dens la concepcion deus costumes, realizats peus designers d'Owantshoozi, a partir de materiaus reciclats.  

Au marge de l'espectacle, deus « Masterklaz Xiberoa » que son estadas miadas dab Iparraldeko Dantzarien Biltzara (IDB). Ua setmana de mediacion culturau qu'ei egaument estada organizada, esmautada d'encontres umans, a l'imatge d'aquera organizada enter un Ehpad de Tardets e l'escòla de Chéraute. « las mascas qui an confeccionats que seràn associats a la decoracion pendent la representacion de Saint-Palais », que soslinha Maite Irigoyen, coordinatora de Berritza.