La poesia dançada de Bilaka a descobrir dab los espectacles Bezperan e Dirau
Dus espectacles de Bilaka que balhan l'escadença d'apreciar l'univèrs poetic d'aqueth collectiu detonant, ne presa dab las aspiracions e las cranhenças de la soa generacion. Bezperan e Dirau, dus univèrs creatius, dus formats : l'un jogat dens los teatres, l'aute dens la carrèra. Com un retorn a las honts.
Actualizat lo : 12 May 2026
Dab la soa darrèra creacion Dirau qui serà desvelada lo 23 de mai a Hendaia, lo collectiu Bilaka que torna a l'esséncia medisha de çò qui ac caracteriza.
Après ua certana frenesia creativa – Gernika, las mitologias Petitas, Ilauna, Bezperan –, los coregrafes-qu'interprètas qu'an avut besonh de tornar a la hont. Qu'explòran un lengatge coregrafic shens artificis entà tornar au plus pròche deus espectators. Ua desmarcha inspirada per Anne Teresa De Keersmaeker : « my walking is my dancing : com marchi, que danci ».
« Qu'avèvam tanben l'enveja de retrobar la carrèra, de prepausar un espectacle dens espacis non dedicats, hòra deus teatres e de las scènas classicas entà tornar frequentar un esperit participatiu car au collectiu », qu'explica Xabi Etcheverry, l'un deus musicians deu collectiu.
Dab aqueth contacte dirècte, la pèça interpretada per quate dançaires e un musician que hè public un complici . L'energia vitau desplegada per la companhia que's retròba per ua dança montant en pression, e d'ua musica entermesclant los ritmics tipics (zortziko, banako….).
Bezperan : ua òda a la natura
Entau lor espectacle Bezperan, « lo dia d'abans » en basco, uei en fin de virada, que son 12 interprètes qui's retròban sus scèna : ueit dançaires e quate musicians.
Que contan l'istòria d'aqueras hemnas e d'aqueths òmis qui, un ser d'ivèrn, dens lo silenci de la vita qui ei pas mei, que van parlar a las abelhas entà los rassegurar. La mesa en scèna de Daniel San Pedro que comença per aquera velhada funèbra, respectant la tradicion d'anonciar la mort a las abelhas entà que contunhen a balhar la lor cera.
« Bezperan, qu'ei ua òda a la natura, e ua mesa en guarda, qu'ajusta lo musician . Que mostram lo ligam qui ns'uneish a las abelhas e qu'alertam sus la lor disparicion, e suus dramas ligats au rescauhament climatic. » D'on ua musica e ua dança de l'urgéncia, sauvatja, ritmica, quasi violenta. Com un desir de desvelhar los òmis quan la tèrra.
Vaquí dètz ans qui la companhia torna visitar la tradicion dab los sons còdis, la soa sensibilitat. Cada dia, qu'aprècia de poder crear en tèrra basca, despuish l'estúdio Oldeak de la Ciutat de las Arts a Baiona, metut a disposicion per la Comunautat País Basco. Que sap tanben comptar suu sostien de partenaris culturaus, dont la Scèna Nacionau deu Sud Aquitan, lo CCN Malandain Balet Biàrritz…, entà difusar la soa òbra, ací e aulhors.
Practic
Après Sent Joan de Lutz, deu 5 au 7 de mai darrèrs, Bezperan que serà jogat a Maulion lo 17 de seteme ; Sent Jan-Pè-de-Pòrt lo 19 de mai seteme.
En seteme, pendent lo Temps d'Aimar de Biàrritz, Bezperan e Dirau que seràn tots dus programats .
La prumèra de Dirau que serà jogada lo 23 de mai au Hestau deu Mai deu teatre de Hendaia (lo davant-prumèra qu'a lòc au licèu Etxepare de Baiona lo 21 de mai).
Que seguirà ua longa virada . Las datas que seràn a retrobar suu lor site internet e sus la pagina Facebook.