L'aviada ciclista basca que torna entà ua 51au edicion

L'Aviada basca qu'ei neishuda en 1976, a l'iniciativa deu presentator de l'epòca, Christian Bibal. Cinquanta ans mei tard, las espròvas bascas qu'obreishen tostemps la sason ciclista amatora e que hèn d'ara enlà referéncia au nivèu nacionau .

L'eveniment que demora l'ua de las raras organizacions a prepausar cinc espròvas flors, disputadas enter la còsta e l'interior de las tèrras, en corrent ua cinquantena de vilatges e en hant estapa a Lo Bocau, Kanbo, Saint-Palais, Sent Jan-la-Vius, Bussunarits e Maulion.

Dab l'Aviada basca, las rotas deu País basco que s'an vist revelar nombrós futurs campions deu Torn de França, taus com Laurent Jalabert, Richard Virenque, Thomas Voeckler, Warren Barguil (vencedor de l'Aviada en 2012), Romain Bardet (melhor escalaire a Bidaishe), Kenny Elissonde (vencedor a Bidaishe), Rudy Molard (vencedor a Bardòs), shens oblidar Arnaud Démare, Adam Yates, Christophe Laporte, Julian Alaphilippe, Jacky Durand o enqüèra David Moncoutié.

Despuish quauquas annadas, l'Aviada basca qu'atira egaument las equipas melhoras de tot País Basco, sustot las resèrvas professionaus de Caja Rurau, Kern Pharma o enqüèra de l'equipa Euskadi, avantcramba d'Euskaltel. Sèt formacions vienudas deu Guipúzcoa, de Navarra e de Biscaia que seràn atau a la partença, aus costats de las granas equipas francesas, dont la continentau federau professionau Vendèa U.

A cada arribada, lo melhor corredor basco que montarà suu podium protocolari entà recéber lo malhòt distintiu, pairinat per la Comunautat d'Aglomeracion País basco.

Aqueth tèxte qu'ei signat Christian Bibal, jornalista esportiu de renom e creator e organizator de la competicion ciclista l'Aviada basca.

Entà seguir lo dirècte :  www.directvelo.com