L'exposicion « Ametsak » que's desvela au castèth de Gramont a Bidaishe
Aqueth dissabte 5 d'abriu, Jean-René Etchegaray, President de la Comunautat País Basco, Muriel Houet, elegida référente deu País de Bidaishe, Jean-François La Sèrra, Maire de Bidaishe e Jean-Jacques La Sèrra, President deu Conselh departamentau de Pirenèus Atlantics qu'èran amassats au Castèth Gramont a Bidaishe entau vernissatge de l'exposicion « Ametsak » de l'artista basco Ariel Elizondo. L'exposicion qu'ei obèrta au public dinc au 30 d'octobre de 2025 .
Actualizat lo : 7 April 2025
Aqueth dissabte 5 d'abriu, lo Castèth Gramont a Bidaishe qu'a arcuelhut lo vernissatge de l'exposicion « Ametsak » de l'artista basco Ariel Elizondo. Vadut a Brussèlas en 1968, aqueth artista contemporanèu, vivent enter Sent- Sebastien e Sent Joan de Lutz, que potza la soa inspiracion dens las soas rasics bascas e lo son ligam intime dab la natura e la matèria. Expausant actuaument en França, Espanha, Portugau, Belgica e Holanda, qu'a egaument realizat installacions de grana envergadura en Austràlia, Itàlia, Soïssa, Estats Units e Marròc. Las 14 esculturas monumentaus d'acèr corten que dialògan armoniosament dab la pèira deu castèth, auherint un encontre penherador enter patrimòni secular e art contemporanèu. Ariel Elizondo qu'a evocat las soas influéncias mesclant natura e tecnica. Las soas òbras, sustot las mei petitas, que son faiçonadas a man e a hred segon tecnicas ancestraus, reïnterpretadas dens ua desmarcha resoludament contemporanèa.
Un trajècte en dus espacis
Sheis esculturas que son installadas sus l'esplanada en liure accès, mentre qu'ueit autes son vededers dens los cors interioras deu castèth. mediacions e animacions que son previstas entà enriquir la descobèrta d'aqueras òbras. Lo calendari deus eveniments qu'ei disponible sus aqueth ligam .
Un castèth viu tota l'annada
Aquera exposicion gratuita que s'inscriu dens ua dinamica d'animacion culturau qui valoriza lo Castèth Gramont tot lo long de l'annada. En 2024 :
- 2 000 visitaires qu'an descobèrt lo site pendent las visitas guidadas e nocturna a las halhas, prepausadas per l'Ofici de Torisme País Basco.
- L'associacion Mosaïc qu'a atirat l'estiu darrèr mei de 3500 personas dab aqueths espectacles de reconstitucion istorica « lo passat recompausat » e « Nueit d'esglasi ».
- Lo Clan Solskirnir qu'a amassat mei de 7000 visitaires pendent la soa dimenjada d'immersion istorica
Un patrimòni preservat e valorizat
Lo castèth de Gramont, classat Monument Istoric, que hè pròva de l'istòria de Bidaishe e deu Baish-Ador. Tornat bastir dens un estile Renaishença après un incendi en 1523, qu'estó un còp de mei estralhat per las eslamas en 1796 e deishat en roeinas. Maugrat lo son estat, qu'atirè visitaires prestigiós com Napoleon III. En 2003, un balh emfiteutic que permetó a la Comunautat de Comunas deu País de Bidaishe d'enterpréner òbras de consolidacion, abotint a la soa reobertura au public en 2012. Despuish 2017, la Comunautat d'aglomeracion País basco que persegueish los esfòrç de preservacion, auherint aus visitaires un panorama unic e ua immersion dens sheis sègles d'istòria.