Natura 2000 : la concertacion au servici de la preservacion de la natura

Los sites Natura 2000 que son abitats naturaus fragiles qui abrigan de las espècias locaus o raras. Que n'existeish 32 a País Basco. zònas situadas en montanha mes tanben lo long deus cors d'aiga, en mar o suu litorau. Vadut dens las annadas 90, aqueth hialat europèu qu'a per mira de protegir los ecosistèmas remarcables mes shens empachar las activitats umanas o economicas de's har, qu'explica Natacha Bareyre Coudurié, cargat de mission au servici Montagne de la Comunautat País Basco.

Conciliar biodiversitat e activitats

Entà conciliar aqueths dus aspèctes, deus comitats de pilotatge amassant actors de terren que son metuts en plaça . Après aver realizat un diagnostic ecologic e economic deu site, que fixan objectius de conservacion e qu'estableishen plans d'accions . Suus massís deu Mondarrain e de l'Artzamendi, un deus cinc espacis Natura 2000 Montagne de País Basco, 15 abitats naturaus e 13 espècias d'interès comunautari que son estats identificats . Qu'ei lo cas de la Soldanelle . Ua planta endemica de País Basco e deus monts cantabrics [aisidament reconeisheder a la soa fòrma en còr] qui's retròba sustot dens las galihòrças crubadas dab un certan nivèu d'umiditat, descrivut Peio Cornu, co-animator deu site. Despuish aquera annada, un protocòle de seguit qu'ei estat metut en plaça dab lo Conservatòri botanic nacionau . La mira de l'estudi qu'ei de qüantificar la talha de las populacions existentas entà poder mesurar la lor evolucion dens lo temps mes tanben identificar las miaças qui pesan sus aqueths abitats sensibles : la randolejada, lo canyoning o quitament de las cuelhudas sauvatjas. Ua practica defenduda, que rapèra lo tecnician .

Ua desmarcha volontària

Nada reglamentacion neta n'enquadra pas las zònas Natura 2000, lhevat l'obligacion de realizar un estudi d'incidéncia en cas d'òbras o d'eveniment d'envergadura. L'animacion deus plans de gestion que pausa essenciaument suu volontariat e l'incitacion. Qu'i pòt aver compensacions financèras, com entaus contractes Natura 2000 o las Mesuras Agroenvironnementales e Ecologicas (MAEC) qui van implicar mesuras a còps costosas, que detalha Natacha Bareyre Coudurié . Mes aquò que pòt tanben estar simplament un engatjament morau, qui convida a respectar bonas practicas quan s'adereish a la carta Natura 2000. Au demiei deus comportaments particularament susvelhats, lo respècte de las activitats pastoraus, qui demoran enqüèra plan presentas en montanha basca, que revesteish un enjòc màger . Si's vòu contunhar a profieitar de la montanha, que cau deus pastors qui l'entertienen e entà los incitar a s'installar, que cau evitar de destorbar los lors tropèths, qu'insisteish Argitxu Lurro, aute cargada de mission suu site deu Mondarrain e de l'Artzamendi. Que'n profièita entà raperar aqueths gèstes simples : tiéner lo son can n'estaca, non pas pas s'apressar de las bèstias e enqüèra mensh los neurir. 

Despuish mantua annada, animators que son presents en hauta sason a la partença deus circuits de randolejadas entà har òbra de pedagogia au près deu public gran. Qu'i a vertadèrament ua creishença fenomenau de la frequentacion entà la practica esportiva, que constata Peio Cornu . La mira d'aquera desmarcha, qu'ei de vulgarizar la sciéncia entà que las personas ajan ua mei grana sensibilitat a la natura.