Navèra estacion d'espuracion de Bidart : 5,6 milions d'euros investits entà la qualitat de l'aiga

Dens lo son projècte de territòri, la Comunautat País Basco que s'engatja a melhorar la qualitat deus cors d'aiga, sustot en modernizant los sons equipaments d'assaniment qui tractan las aigas usadas abans la lor arribada en miei naturau. La construccion d'ua estacion navèra d'espuracion a Bidart que respon ad aqueth objectiu .

Iniciaument metuda en servici en 1971 puish parciaument reabilitada en 1997, l'estacion qu'èra arribada en limit de capacitat dab un risc de saturacion. La renovacion completa que s'impausava entà garantir la continuitat deu servici, protegir los mieis naturaus - lo litorau e l'ocean - e preservar la qualitat de vita deus abitants. Après la presa de competéncia assaniment per la Comunautat d'Aglomeracion en 2018, deus estudis de factibilitat puish de mestresa d'òbra an condusit a la realizacion de las òbras sus dus ans, tot en assegurant la continuitat de tractament.

De las innovacions màgers entà ua estacion performanta

Lo projècte de renovacion qu'a permetut de portar melhoraments màgers :

• Capacitat de tractament portada a 37 300 EH, securizant l'arcuelh deus abitants e la gestion deus flux toristics ;
• Melhora proessa environamentau e acostica, gràcias a equipaments de punta installats dens bastiments insonorizats qui a per mira de redusir las nosenças entaus arriberans ;
• Aluenhament deu bacin navèth d'aeracion ne hons de parcèla, entà limitar eficaçament las nosenças tindairas ;
• Installacion d'equipaments performants limitant la consomacion d'energia ;
• Excellenta qualitat de l'aiga tractada per la començada d'un tractament terciari aus UV garantint la preservacion deus mieis aqüatics e la conformitat de las aigas de banhada. Tenent compte de la qualitat deu tractament, los servicis de la Comunautat País Basco e de Bidart que tribalhan en parallèla sus la possibilitat de reütilizar las aigas usadas tractadas de l'estacion a fins d'arrosatge e de curatge de hialats. L'objectiu qu'ei atau de redusir l'utilizacion de l'aiga bevedera e la pression sus la ressorsa en aiga.