País Basco : lèu l'eusko que serà transfrontalèr
A l'iniciativa d'Euskal Moneta e Gizartearen Moneta, responsables politics e estructuras de País Basco qu'èran amassats aqueth dissabte 8 de heurèr a Baigorri entà escambiar suu projècte de moneda locau transfrontalèra. En se prement l'escaduda de l'Eusko, l'ambicion qu'ei d'espandir aquera experiéncia au País Basco sud.
Actualizat lo : 11 February 2025
12 ans a, l'Eusko qu'èra lançat . Uei dab 4 milions d'eusko en circulacion e 4 000 utilizators particulars, l'eusko qu'ei vadut la prumèra moneda locau d'Euròpa . D'aquera experiéncia escaduda qu'ei neishuda la reflexion de crear ua moneda locau transfrontalèra, prumèra deu genre en Euròpa. L'objectiu : ahortir l'economia locau, assolidar los ligams economics transfrontalèrs e promòver la lenga basca.
Aqueth dissabte 8 de heurèr, lo seminari « Vèrn ua moneda complementària transfrontalèra » qu'a permetut d'amassar responsables politics e estructuras deu País Basco nòrd e sud entà un escambi sus l'abans deu projècte e las estapas vienentas.
Jean René Etchegaray, President de la Comunautat d'Aglomeracion País Basco qu'èra present ad aqueth encontre aus costats d'Eider Mendoza, Presidenta de la Deputacion Forau de Gipuzcoa, Ana Ollo, Vicepresidenta deu governament de Navarra e conselhèra a l'Accion exteriora, Aizpea Otaegi, Maire d'Errenteria e President de l'agéncia de desvolopament d'Oarsoaldea, Lorea Lizarreta, conselhèra municipau deu Baztan, Luca Pastorelli, Director deu hialat Diesis e deus representants d'Euskal Moneta e de Gizartearen Moneta a l'iniciativa deu projècte.
« A la velha deus Encontres Transfrontalèrs, aqueth projècte que demòstra las sinergias enter las nostas institucions e lo lor engatjament dens un desvolopament duradís deu noste territòri transfrontalèr » qu'a soslinhat Jean René Etchegaray, President de la Comunautat d'Aglomeracion País Basco. « Autanlèu la soa creacion la Comunautat País Basco qu'a desirat portar lo son sostien a l'eusko e qu'acompanha despuish 2023 lo projècte Gizartearen Moneta. Un projècte portaire de las valors qui la nosta institucion s'estaca a promòver : participacion ciutadana, transicion ecologica e desvolopament de la lenga basca. »
Los participants que's son acordats a soslinhar que lo projècte obriva la via a l'apregondiment de las relacions transfrontalèras e a la promocion de l'economia e deu comèrci locaus. Un tribalh qu'a començat a Baztan (Navarra) e a Oarsoaldea (Gipuzkoa) dab los ciutadans e los actors sociaus e economics. Mantua reünion publica qu'ei dejà prevista dens aqueras duas regions .
Un tribalh qu'a començat a Baztan (Navarra) e a Oarsoaldea (Gipuzkoa) dab los ciutadans e los actors sociaus e economics. Mantua reünion publica qu'ei dejà prevista dens aqueras duas regions .