Patrimòni basco : ua carta interactiva entà remontar lo temps
Gràcias a la prumèra carta interactiva deu patrimòni basco, la Comunautat País Basco que balha accès en memòria de milèrs d'edificis remarcables deu noste territòri. Un convit a portar un espiar navèth e curiós suu passat deu son quartièr o de la soa comuna.
Actualizat lo : 5 August 2026
Qu'ei un projècte inedit qui desvela uei la Comunautat País Basco. Gràcias a la prumèra carta interactiva deu patrimòni basco, qu'ei d'ara enlà possible de descobrir en quauques clics los edificis e elements istorics remarcables a l'entorn de casa soa.
Deus milèrs de lòcs istorics
Aquera platafòrma navèra qu'amassè peu purmèr còp, sus un medish supòrt, mantun milèr de referéncias gessidas deus Monuments istorics, deus Inventaris deu patrimòni regionaus e deus recensaments participatius realizats dab las comunas dens l'encastre deus Plans locaus d'urbanisme intercomunaus (PLUi). Pensada tanben plan entaus curiós e passionats d'istòria qui entaus ensenhaires o los especialistas, l'atruna que facilita l'accès a ua coneishença fins aquí dispersada dens diferentas basas de dadas .
La màger part deus punts d'interès que son illustrats per fotografias o deus archius istorics e acompanhats d'ua documentacion qui descriu lo lor passat, las lors caracteristicas arquitecturaus o la lor importància patrimoniau. Un classament que facilita egaument la navigacion en regropant los sites per granas tematicas : arquitectura religiósa, abitat tradicionau, patrimòni militar, obratges d'art, edificis publics…
Los traç d'ua memòria collectiva
Au delà de la soa dimension documentària, aquera carta que balha tanben a véder pans mesconeguts e a còps oblidats de la nosta istòria collectiva. Ací ua anciana bòrda, aquí un ostau de maitre, ací enqüèra los vestigis d'ua escòla, d'un molin vielh o d'un auspici. Que crea ponts enter las epòcas, las generacions e que conta faiçons diferentas d'abitar un medish territòri. Un convit a portar un espiar mei sensible e mei pregond suu son environament.
E ac sabètz ?
Despuish 2021, la Comunautat País Basco qu'a creat ua Mission « Inventari deu patrimòni », cofinancée a 50 % per la Region Novèla Aquitània. L'enjòc : conéisher mélher e har conéisher lo patrimòni de País Basco. Las coneishenças aquesidas que sèrven egaument a preservar los bastiments e elements remarcables deu noste territòri pendent l'elaboracion deus Plans Locaus d'Urbanisme intercomunaus (PLUi) o de la començada vienenta deu Parc naturau regionau de la Montanha Basque.