Salon de las transicions : retorn sus ua matiada d'informacion entà las enterpresas

Lo Salon de las transicions - Trantsizioen azkoa - que s'ei tienut au generator d'activitats Arkinova d'Anglet lo 26 de heurèr. Près de 110 personas qu'èran presentas pendent aquera sequéncia matièra en dus temps, entà descobrir un ventalh de dispositius en favor de las transicions prepausats per l'Ademe, BPI França, la Region Novèla Aquitània, la Comunautat d'aglomeracion País Basco e autes partenaris. 
Objectiu : portar informacion practica, deus contactes dirèctes e de raperar los enjòcs entau territòri, afichats dens lo Plan Climat País Basco. 

Entà tendre ad aqueths objectius de descarbonacion de las activitats - las de la Comunautat d'aglomeracion e mei largament deu territòri -, l'enjòc qu'ei d'embarcar los actors deu territòri, au demiei deus quaus las enterpresas, qu'an raperat Julien Berthier, secretari generau a la transicion energetica e planificacion ecologica de la Comunautat País Basco e Mathieu Dutilh, Director generau adjunt a l'economia.

De las enterpresas en cèrcas de solucions concrètas 

Daubuas enterpresas qu'èran presentas entà trobar ua solucion a un problèma precís, a l'imatge de la societat bidartar Satlantis França : « Que vienem véder si dispositius existeishen entà perseguir lo noste projècte de deteccion de hueita de metan, que precisan dus responsables . Qu'èm en cèrcas d'informacions sus acompanhaments ciblats e mei largament sus dispositius existent en matèria de transicion energetica. » 
« Ací, en un sol lòc, qu'avem las informacions practicas, los contactes dirèctes deus interlocutors. Qu'ei un ganh de temps », que s'ei regaudit Céline Uhaldeborde de Bastidarra, societat de Bardòs dejà engatjada dens accions de descarbonacion : bilanç carbòni, diagnostic biodiversitat, estudi sus la reütilizacion de l'aiga -, e qui enten perseguir sus la soa lançada.  

De las atrunas entà accelerar la transicion energetica

En prumèra partida, los organizators qu'an presentat dispositius ciblats . BPI França qu'a citat lo « diag descarbonacion », lo « diag éco-flux », lo « diag deu BTP », lo programa « accelerador » lançat en seteme. La Region Novèla Aquitània qu'a metut l'accent sus dus dispositius destinats au sostien de la competitivitat energetica de las enterpresas. 
La Comunautat d'aglomeracion País Basco qu'a evocat lo programa enterpresa e aiga, lo contracte resiliéncia e proessa, l'ajuda a l'immobiliari, l'accion collectiva de proximitat (ACP), lo talhèr de l'innovacion au servici de las transicions. L'ADEME qu'a concludit la presentacion exprès dab l'iniciativa Act. 

Las enterpresas qu'an podut perseguir l'escambi dab aqueths partenaris e autes actors, per taulèrs dedicats. Bil La toa Garbi, la Convencion de las enterpresas entau Climat, lo Centre nacionau de la proprietat forestièra, lo Sindicat de las Mobilitats País Basco - Ador qu'an completat lo panèl deus dispositius presentats .