Ua dimenjada devath lo signe deu basco e deu gascon
La dimenjada de las 9 e 10 de mai qu'a metut a l'aunor las lengas deu territòri per dus rendètz-vos populars e engatjats : l'arribada de la Passem a Anglet e l'edicion navèra de Herri Urrats a Sent-Pée-sus-Nivelle. Aus costats de las associacions, deus benevòles e deus abitants, lo President de la Comunautat d'Aglomeracion País Basco qu'a reafirmat lo son engatjament en favor de l'euskara e de l'occitan-gascon.
Actualizat lo : 11 May 2026
Pendent dus dias, País Basco qu'a viscut au ritme de las soas lengas .
Dissabte 9 de mai, Anglet qu'arcuelhè l'arribada de la Passem, grana corsa-relai en favor de l'occitan-gascon. Pendent onze dias, los corredors qu'an corrut mei de 2 000 quilomètres per ueit territòris istorics de Gasconha. Lo relai qu'a traversat mantua comuna de País Basco : Osserain-Rivareyte, Samas, Came, Bidaishe, Bardòs, Urt, Lo Bocau, Baiona e fin finau Anglet, vila d'arribada d'aquera edicion 2026.
Ad aquera escadença, Alain Iriart, President de la Comunautat d'aglomeracion País Basco qu'a desirat raperar l'estacament de l'institucion a la diversitat lingüistica deu territòri e lo son sostien aus actors engatjats entà la transmission deu gascon. Portada per l'associacion Ligams, La Passem que mobiliza a cada edicion deus milèrs de participants, associacions, collectivitats, enterpresas e benevòlas a l'entorn de la lenga occitana-gascona.
« la nosta Comunautat qu'ei ua tèrra d'encontre enter lo basco, lo gascon e lo francés. Aquera diversitat que hè la nosta riquessa e que contunharam a sostiéner l'euskara com l'occitan-gascon », qu'a soslinhat Alain Iriart .
L'arribada de la Passem a Anglet qu'a balhat lòc a un programa hestiu e culturau portat per las associacions locaus, sustot l'associacion angloye Hestas e pastoralas en baish Ador, organizatritz deu vilatge d'arribada, dab l'espectacle musicau « A tot Vedent », amassant artistas amators e professionaus.
L'endedia, deus milèrs de personas que's son retrobadas a l'entorn deu lac de Sent-Pée-sus-Nivelle entà celebrar Herri Urrats, la hèsta annau de las ikastolas organizada per Seaska. Plaçada aquera annada devath l'eslogan « Gero eraikiz » (« Bastir l'aviéner »), aquera edicion 2026 qu'a un còp de mei metut en lutz los enjòcs de transmission e de desvolopament de la lenga basca.
Dens la soa intervencion, lo President de la Comunautat d'Aglomeracion País Basco qu'a saludat lo tribalh miat despuish mantua decennia per Seaska e l'ensemble deus actors engatjats entà l'euskara. Qu'a raperat los progrès complits gràcias au hialat de las ikastolas, qui arcuelh uei mei de 4 000 escolans sus l'ensemble deu territòri.
« l'aviéner de l'euskara que's jòga adara . Que devem contunhar a tribalhar amassa entà balhar tota la soa plaça a la lenga basca dens la nosta societat e dens las nostas institucions », ce a declarat, raperant egaument l'objectiu partatjat d'aténher 30 % de bascofònes d'ací 2050. Lo projècte de futur licèu de Saint-Palais, portat per Seaska, qu'ei egaument estat metut a l'aunor .
Per aqueths dus eveniments populars, hestius e federators, la Comunautat d'Aglomeracion País Basco qu'a reafirmat lo son sostien a las iniciativas qui participan a la vitalitat de las lengas deu territòri e a la lor transmission.