Ua pista ciclabla de 2,5 km lèu creada suu baloard deu BAB
A comptar deu 30 de març e dinc en heurèr de 2027, un obrador en duas fasas que serà miat suu baloard deu BAB entà auherir aus ciclistas un espaci de circulacion mei amatigat.
Actualizat lo : 27 April 2026
Qu'ei ua vertadèra metamorfòsi qui s'aprèsta a conéisher lo baloard deu BAB ! Au començar de 2027, aqueth èish rotèr centrau de la còsta basca, fins alara defendut aus ciclistas, que va conéisher ua transformacion en pregondor entà deishar mei de plaça a las bicicletas e vàder un espaci de circulacion mei amatigat.
Ua pista ciclabla de 2,5km
L'amainatjament que consisteish a crear ua pista ciclabla, longa de 2,5 quilomètres, despuish lo quartièr Larochefoucauld dinc au giratòri deu Tuc a las Calhas. Aqueras òbras que permeteràn d'obrir aus ciclistas un prumèr tròç deu baloard deu BAB, qui serà connectat, a cada extremitat, au hialat de las pistas ciclablas dejà existint cap a Biàrritz, Anglet e Baiona.
Entièrament securizada dens un correder separat de la circulacion automobila, aquera via que serà obèrta a la circulacion de las bicicletas en doble-sens. Que serà entièrament amainatjada a dreta de la via automobila, dens lo sens Biàrritz-Baiona. Aquò que permeterà aus arriberans e usatgèrs de religar en bicicleta las principaus zònas comerciaus e servicis a proximitat. De navèths cairehorcs que seràn egaument amainatjats entà redusir la velocitat de circulacion suu baloard e limitar lo brut e la pollucion sus aquera zòna particularament expausada. Mantua traversada entà pedanhs e ciclistas que seràn tanben creadas entà religar mélher los dus costats deu baloard.
Lo projècte que preved, en mei, la creacion d'un caminament pedanhèr despuish la carrèra Marie Blanque e la carrèra de las Pontrits dinc au cairehorc deus 5 cantons entà auherir un accès mei dirècte a las residéncias entorns. Un aute caminament que serà creat a l'entorn deu giratòri de Bahinos .
Ua circulacion adaptada pendent las òbras
L'obrador que debutarà lo 30 de març dinc au cap deu mes d'aost de 2026 . Que reprenerà puish en noveme entà s'acabar en heurèr de 2027. Pendent aqueths periòdes, las duas vias de circulacion dens lo sens Biàrritz-Baiona que seràn temporàriament redusidas a ua via, per seccions. Ua senhaletica ahortida que serà metuda en plaça aus abòrds e sus l'obrador entà previéner e guidar au mélher los usatgèrs. Las entradas e sortidas de las residéncias atau com los accès aus comèrcis seràn tots mantienuts.
Un mediator suu terren
Un mediator que serà disponible entà respóner a las questions e reculhir las remarcas suu terren. Que serà juntader deu diluns au divés de 9h a 17h au 06 15 82 89 51.
Lo projècte, d'un montant de 2,34 milions d'euros, qu'ei finançat per la Comunautat d'Aglomeracion País Basco, gestionari d'aquera via, l'Estat peu fons de sostien França Que relança e la Vila d'Anglet. hons europèus (FEDER) que son egaument estats sollicitats .
Dab aquera operacion navèra, lo desplegament d'un hialat ciclable mei dense e mei coherent que's persegueish sus l'ensemble deu territòri entà encoratjar las alternativas a l'auto.
Lo projècte en quauquas chifras
2,3 milions d'euros
que son engatjats dens aquera operacion de grana amplor entà desvolopar las mobilitats doças e melhorar la qualitat de l'aire.
-
2,5 quilomètres
de pista ciclabla que seràn amainatjats entà facilitar e securizar los trajèctes en bicicleta.
-
70%
de la pista ciclabla que beneficiarà d'ua largor d'au mensh 3,50 mètres entà auherir un espaci confortable aus ciclistas.
-
Un detzenat d'enterpresas
que seràn mobilizadas entà condusir l'obrador, en majoritat de las PME installadas locaument, representant haut o baish ua cinquantena d'emplecs.
