Un espectacle oniric a descobrir en bòsc a Ostabat, Lo Bocau e Anglet

Lo 19 d'abriu, lo bòsc Oztibarre d'Ostabat-Asme que prestarà lo son quadre a l'espectacle Petit quauqu'un, programat per la Scèna Nacionau deu Sud Aquitan. Qu'ei metut en scèna per la companhia Lo Sindicat d'iniciativa segon la pèça Polywere qui l'autora, Catherine Monin, qu'a especiaument tornada escríver a l'intencion deus joens . Aqueth espectacle jogat en plen bòsc qu'a hèit l'objècte d'ua residéncia de creacion miada en associacion dab la Comunautat País Basco. 

Dens los bòscs d'Ostabat autanlèu aqueth 19 d'abriu, puish dens los bòscs deu Lo Bocau e d'Anglet quauques dias après, un medish scenari originau qu'embarcarà los mainatges e los lors parents dens l'univèrs d'un mainatge singular. Tom qu'ei dotat d'ua empatia shens limits entaus animaus. Un dia, tresvirat per la mort d'un cèrvi, lo mainatge que comença de s'aluenhar de l'umanitat entà tibar cap a l'animalitat. Segon los mètges, que deu estar tractat. Lo mainatge ipersensible que hugeish e que's refúgia en bòsc, on se vòu integrar au monde sauvatge. Aquera parentèsi en plea natura que'u convida a inventar ua relacion navèra a las plantas, aus animaus… Elle qu'ac conduseish a ua auta percepcion deu temps, de l'espaci. Mentretant, parents, suenhants…, que parteishen ac cercar. 

Si interrogar suu ligam a la natura, l'animalitat   

Vestits de tienudas roja viu, tres actors de la companhia de teatre contemporanèu que campan tor-a-tor aqueths personatges dab gran acompanhament de mascas, de hustas, de monaquetas, auherint un univèrs quimeric qui parlarà aus mainatges. « L'important entà que ns'ei que los joens s'interrògan sus la plaça deus autes vivents, sus las nòrmas sociaus e autas injoncions, sus las rasons qui an progressivament possat l'òmi a se copar deu monde animau e sauvatge », qu'eslissa Carlos Martins, l'un deus comedians e codirector de la companhia. Lo tèxte, sensible, qu'apèra a inventar un aute rapòrt au monde qui ns'entorneja. 

Signada per Julien Duval, la mesa en scèna espurada dens un decòr naturau que permet ua relacion dirècta dab los espectators . Lo son qu'ei lo sol element tecnic portat . « l'espectacle qu'agradarà autant aus mainatges qui aus parents, qui n'auràn segurament ua auta lectura » qu'assegura lo comedian . 

Lo concèpte qu'ei estat testat pendent ua sortida de residéncia, dens aqueth medish bòsc d'Ostabat. Au marge de l'espectacle, deus mainatges de classas d'educacion artistica de Larceveau e de Mendive qu'avèvan dejà podut participar a talhèrs creatius entà s'interrogar sus aqueth ligam a la natura, l'animalitat. 

Practic

Aqueth espectacle teatrau de 50 mn vededer autanlèu l'atge d'8 ans qu'ei a descobrir : 

• lo 19 d'abriu dens lo bòsc d'Oztibarre a Ostabat-Asme a 11h e 17h.

• lo 25 d'abriu au bòsc Guilhou a Lo Bocau a 17h

• lo 26 d'abriu dens lo bòsc deu Pignada d'Anglet a 11h e 17h

Entà conéisher las tarifas, la localizacion exacta GPS, e reservar : https://www.scenenationale.fr/spectacle/petit-quelquun-julien-duval

E  ac sabetz ? L'espectacle qu'ei coréalisé per la scèna Nacionau deu Sud aquitan dab l'Ofici Artistic de la Region Novèla Aquitània (OARA) en associacion dab la Comunautat País Basco.