Un talhèr en euskara entà compréner los rodatges de l'informacion

Qu'ei l'emulacion aqueth dimèrcs 26 de noveme dens l'un deus estúdios d'enregistrament de la ràdio associativa bascofòna Gure Irratia, a Ustaritz. Sheis gojatas de 4^e deu collègi immersiu Kattalin Elizalde de Sent-Pée sus Nivelle que s'aprèstan a entervistar l'un de « los lors musicians preferits » : Ortzi Hegoas, lo bateire de Xutik. 

Aquera entervista que s'inscriu dens l'encastre deu talhèr « Vai actor de l'informacion ! » organizat per Gure Irratia entà Euskararen Urtaroa. « l'objectiu qu'ei de'us apréner a tractar, recéber e difusar ua informacion. Que s'ensaja de'us balhar de las claus entà compréner mélher los mèdias e l'informacion locau », precisa Olatz Idoate. Lo jornalista e animator de la ràdio labourdine qu'a a còr de raperar lo ròtle d'ua ràdio associativa tau com Gure Irratia, e de presentar Euskal irratiak, lo hialat de ràdios de proximitat en euskara qui regropa egaument Xiberoko Botza, Irulegiko Irratia, Amikuzeko Irratia e Antxeta Irratia. 

De las aprendissas jornalistas bascofònes

Aqueth matin, Olatz qu'enquadra las gojatas dab benvolença, que'us aconselha entà preparar au mélher l'entervista, ciblar las bonas questions au par de la personalitat deu convidat, a plan articular entà èste audibles a l'antena. « Qu'ei genhèc d'èste dens un vertadèr estúdio, qu'eslissa Oihane . Que's compren mélher la tecnica, lo jòc deus sons ».   

Oihane, Lur, Xana, Ima, Haira, Paola, ne son pas aquí per asard . Au collègi Kattalin-Elizalde a Sent-Pée, que participan dejà au talhèr ràdio « Kaeirratia ». Mes aquí, que hida Lur, « èste en situacion dab jornalistas qui s'escota, e que los nostes parents segueishen despuish longtemps, qu'ei super ». 

E que díser de « aqueth astre » qui'us ei balhada d'entervistar ua estela locau. Qu'èra aquí ua vertadèra « suspresa » entad aqueras gojatas de 12-13 ans, vengudas ad aqueth talhèr suu lor temps de lésers, dab l'ua deus lors professors. Las questions que fusan entad aquera entervista enregistrada qui serà difusada dimars 2 de deceme a 9h15 sus Gure Irratia.  

La question de las faussas novèlas 

En amont de l'entervista, la question de las faussas novèlas qu'èra  estada abordada per Olatz : « Qu'èi tienut a evocar un subjècte qui'ns sembla essenciau : la prevencion de cap a las faussas novèlas ». Aus sons costats, Joana Irigaray qu'assent . Anciana jornalista, uei professor de letras modèrnas dens lo collègi bascofòne, qu'estima vitau de balhar aus joens a identificar aqueras faussas informacions. « Qu'ei essenciau de'us educar a localizar los vertadèrs sites d'informacion entà non pas pas se deishar gahar dens aquera jungla numerica. »

Ua mission qui s'ei balhada, e dont tracta sustot pendent la Setmana de la premsa dens lo son collègi. « Ne's ns'ac repeteish en cors e ací qu'i a sites drin hidables dont se cau mesfisar » que precisen Haira e Paola. « D'ara enlà, que haram vertadèrament atencion a las honts deus articles entà evitar las rumors e faussas informacions », qu'eslissan las collegianas .  

A notar : dens l'encastre d'Euskararen Urtaroa, la ràdio Gure Irratia qu'a egaument animat un talhèr entà formar joens a comentar ua partida de l'equipa Còsta basca handbal. Tostemps en euskara.