Que vòli transformar los mens produits a la bòrda
A País Basco, près de 650 bòrdas que transforman tot o partida de las lors produccions : hormatges, poralhas, ueus, bovins, pòrcs, blat, etc. Que trobaratz sus aquera pagina deus conselhs practics entà vse lançar e estar acompanhat dens la desmarcha.
Actualizat lo : 17 February 2026
Perqué transformar los sons produits ?
La transformacion a la bòrda a País Basco que pòt englobar activitats taus com la transformacion de las cerealas en haria, la transformacion de la lèit en produits leitèrs (com lo hormatge o l'iogort), la fabricacion de confituras, la produccion de shuc de hruts, la transformacion de la carn, la fabricacion de produits cosmetics a basa d'ingredients de la bòrda, etc.
Aquera desmarcha que permet aus agricultors :
- de diversificar las lors honts de revienuts ;
- d'ajustar valor aus lors produits ;
- de respóner a la demanda locau entà produits transformats de faiçon artisanau ;
- d'ahortir los ligams enter los agricultors e los consumeires locaus en favorizant ua economia locau, en promovent un apròchi mei duradís de l'agricultura.
Com finançar equipaments entà la transformacion bordièra ?
La Comunautat País Basco qu'acompanha los agricultors, en individuau o en collectiu, e las enterpresas de mensh de 10 salariats, a desvolopar navèths produits e méter en plaça mòdes navèths de comercializacion en circuits corts e/o de proximitat.
Ne saber mei sus l'Aperet a projèctes « Valorizacion de las produccions agricòlas locaus ».
Qu'èi questions tecnicas o sanitàrias tà çò de la transformacion bordièra
Que'vs podetz apressar Associacion deus Productors Bordièrs de País Basco (APFPB)
L'APFPB qu'ei ua associacion de defensa e d'acompanhament deus productors bordièrs. Que gereish egaument la carta bordièra IDOKI e la soa promocion collectiva.
Las soas principaus accions que son :
- d'informar los productors sus la transformacion bordièra, la qualitat sanitària e la diversificacion deus produits ;
- méter en plaça formacions sus la transformacion bordièra (lèit, hormatge, carn, legumes, cosmetics, …) ;
- d'ajudar a la realizacion deus talhèrs de transformacion ;
- d'acompanhar projèctes collectius de transformacion bordièra, com la CUMA Xuhito a Sent-Pée-sus-Nivelle ;
- Har crompas gropadas de materiau (haut o baish 100 referéncias) ;
- Acompanhar los projèctes de comercializacion e de comunicacion ;
- Desvolopar la promocion collectiva de la carta bordièra de qualitat IDOKI.