Aperet a projèctes Mendi Jakitateak en montanha basca

Aqueth aperet a projèctes qu'ei neishut de la volontat de la Comission Montagne de la Comunautat d'Aglomeracion País Basco, en ligam dab los engatjaments de la soa Politica Montagne 2023-2026, de méter endavant los saber-har especifics de la montanha basca, ligats a las activitats economicas (artisanat, agropastoralisme, silvicultura,…) com a la cultura e au patrimòni locau (lenga, dança, cant, teatre, espòrts e lésers, arquitectura,…). saber-har transmetuts de generacion en generacion, de par a par o de mèste a aprendís, qui son autant d'atots entau desvolopament e l'atractivitat d'aqueth territòri rurau.
L'aperet a projèctes que mira atau a sostiéner projèctes permetent d'encoratjar la preservacion, la valorizacion e la transmission d'aqueths saber-har especifics a la montanha basca o benefica entad aqueth territòri.

Tota estructura locau que pòt candidater : associacion, comuna o organisme public, enterpresa, sindicat, establiment escolar,…
Los particulars ne son pas eligibles .

Los projèctes que deven :

• Estar realizats suu territòri de la Montanha basca (véder perimètre de las 111 comunas en telecargament) ;
• Estar realizats abans lo 31 de deceme de 2026 ;
• Respóner aus objectius de l'aperet a projèctes : preservar, valorizar e transméter saber-har especifics a la montanha basca. Las accions consideradas que deven atau perméter d'evitar de pèrder saber-har qui riscan de desaparéisher, de conéisher mélher, har conéisher e reconéisher saber-har mesconeguts, ancians o navèths, de mostrar e explicar l'especificitat d'aqueths saber-har e de valorizar çò qui pòrtan au territòri, de favorizar e encoratjar la transmission d'aqueras coneishenças practicas, en particular au près de las generacions joenas.

Los projèctes eligibles ad autes dispositius d'ajuda de las politicas publicas (Economia, Cultura, Agricultura, Transfrontalèr…) de la CAPB ne son pas eligiblas ad aqueth aperet a projèctes.
Retrobatz mei de detalhs e deus exemples de projèctes eligibles/non eligibles dens lo Reglament de l'aperet a projèctes.

Los portaires de projècte que deven precisar lo montant de subvencion sollicitat au par deus lors besonhs en presentant un budget e un plan de finançament previsionau de l'operacion.
Lo montant de subvencion atribuït qu'ei estudiat en foncion de la pertinéncia deu projècte au par deus objectius mirats per l'aperet a projècte e deus critèris de priorisation, de las despensas presentadas, deu seriós deu plan de finançament e de l'efèit lhevader de la subvencion sollicitada. Lo plafon maximum de subvencion qu'ei fixat a 5 000 €.

La candidatura que deu estar compausada deu formulari dument complit, acompanhat deus estatuts de l'estructura e d'un RIB.
Las candidaturas que deven estar enviadas enter lo 5 de junh  e lo 28 de seteme de 2025, per corric, a  l'adreça : montagne.paysbasquecommunaute-paysbasquefr

Los projèctes que seràn examinats per ua jurada amassant membres de la Comission montanha, au par deus critèris de priorisation seguents :
Critèris ligats au saber-har concernit :

• Un saber-har en ligam dab la montanha basca
• Un saber-har viu
• Un saber-har practicat per un collectiu

Critèris ligats au projècte :

• Un projècte qui s'estaca a la transmission de saber-har
• Un projècte collectiu e/o participatiu
• Un projècte qui s'inscriu dens ua logica de desvolopament duradís

Los resultats definitius de l'aperet a projècte (projèctes retienuts e montants de subvencion atribuïts) que seràn  comunicats en deceme de 2025, après lo vòte de las instàncias deliberativas de la CAPB.