La mea consomacion e la mea factura d'aiga

Que voletz compréner las informacions qui figuran sus la vòsta factura d'aiga, saber com seguir la vòsta consomacion e reportar un eventuau incident ? Que quauqu'un vs'explica tot en detalh .

Actualizat lo : 5 June 2025

Euskaraz irakurri

Com seguir la mea consomacion ?

Lo vòste comptader d'aiga que permet de mesurar la vòsta consomacion d'aiga en mètres cubics (m³). Qu'ei la proprietat de la collectivitat mes lo son entertien e lo son renovelament qu'incombeishen au vòste hornidor d'aiga . Entad ac protegir, que devetz velhar a :

  • Ac protegir contra lo gèu e los tusts
  • Non pas modificar lo son emplaçament
  • Non pas copar los plombs e cachets

Lo relhevat deu vòste comptader d'aiga qu'ei efectuat au mensh un còp per an. Que'n devetz facilitar lo son accès entà perméter la soa lectura. Segon lo cas, aqueth relhevat qu'ei hèit manuaument o a distància. Entà seguir la vòsta consomacion regularament :

  • Relhevatz las chifras negras (mètres cubics) e rois (litres)
  • Comparatz dab los vòstes relhevats precedents en calculant la vòsta consomacion mejana jornalèra (consomacion relhevada dividida peu nombre de dias enter 2 relhevats)

Bon a saber : entà detectar ua hueita, que relhevatz lo vòste comptader lo ser davant de'vs cocar e verificatz-ac au desvelh (shens consumir d'aiga mentretant). Si las chifras an cambiat, qu'ei lo signe d'ua probabla hueita . En cas de hueita sus ua canalizacion privada, que podetz, devath daubuas condicions, beneficiar d'un descarc sus la vòsta factura. 

Com léger la mea factura d'aiga ?

Au rècto de la vòsta factura

Que trobaratz sustot :

  • las vòstas referéncias client (numèro client, adreça desservida,…) ;
  • las coordenadas deu vòste hornidor d'aiga e d'assaniment (adreça, numèro de telefòne, …) ;
  • lo resumit de la factura presentada (consomacion, montant totau a pagar, informacions suu pagament, …).

Au denvèrs de la vòsta factura

  • ua rubrica « distribucion de l'aiga bevedera » comprenent sustot ua part fixa (l'abonament) e ua part variabla (basada sus la vòsta consomacion en m³)
  • ua rubrica « collècta e tractament de las aigas usadas », si lo vòste immòble ei desservit per un hialat public d'assaniment collectiu, comprenent sustot ua part fixa (l'abonament) e ua part variabla (basada sus la vòsta consomacion en m³)
  • ua rubrica « organismes publics », integrant las taxas e redevenças percebudas entau compte de diferents organismes qui finançan accions de proteccion de la ressorsa en aiga, de modernizacion deus hialats e de luta contra las pollucions, atau com la taxa sus la valor aponduda (TVA) percebuda entau compte de l'Estat.
  • se s'escad, que's pòden ajustar de las prestacions annèxas pagantas ligadas au contracte d'abonament (fresc d'obertura, fresc d'anullacion, duplicat de factura, …).

Bon a saber : despuish lo 1er genèr de 2025, la refòrma de las redevenças de l'Agéncia de l'aiga que simplifica lo sistèma : las taxas ligadas aus regets deus cobles e a l'entertien deus hialats que desapareishen . Que son remplaçadas per tres navèras taxas sus la consomacion d'aiga, la qualitat deus hialats e l'eficacitat deu tractament de las aigas usadas. L'objectiu qu'ei ua reparticion melhora deus còsts e ua gestion mei eficaça de l'aiga. 

Abans la refòrma

Aiga bevedera :

  • redevença prelevament
  • redevença pollucion domestica

Assaniment collectiu :

  • redevença modernizacion deus hialats de collècta

Après la refòrma

Aiga bevedera :

  • redevença prelevament sus la ressorsa en aiga
  • redevença sus la consomacion d'aiga bevedera (exoneracion entà las activitats de neurissatge)
  • redevença entà proessa deus hialats d'aiga bevedera

Assaniment collectiu :

  • redevença entà proessa deus sistèmas d'assaniment

Quaus son las tarifas de l'aiga sus la mea comuna ?

Au 31 de deceme de 2022, qu'existiva suu territòri mei de 575 tarifas diferentas, gessits deu transferiment de competéncias de 2018. Entà melhorar la qualitat deus servicis d’aiga e d’assaniment, en armonizant progressivament las contribucions de cadun, las tarifas que son estadas ajustadas segon las modalitats seguentas .

Entaus particulars e enterpresas (hòra agricultors) 
La deliberacion 53 deu 17 de deceme de 2024 fixe : 

  • ua redefinicion de la part variabla entà cada comuna dab ua aumentacion progressiva de las tarifas mei baishas dinc a las tarifas navèras machar (1,92€ HT e hòra redevenças /m³ entà l'aiga e 2,72 € HT e hòra redevenças /m³ entà l'assaniment collectiu). La part fixa, corresponent a l'abonament annau, ne vària pas (40€ HT per an) ;
  • ua aumentacion progressiva e limitada a 40€ HT, sus ua factura de 120 m³ (referéncia entà ua familha de 4 personas).

Entaus agricultors
La deliberacion 51 deu 15 de deceme de 2023 qu'a definit de las mesuras tarifàrias especificas dab :

  • ua redefinicion de la part variabla entà cada comuna dab ua aumentacion progressiva de las tarifas, plafonada a las tarifas de 1,5012€ HT e hòra redevenças entà l'aiga bevedera e 2,0386€ HT e hòra redevenças entà l'assaniment collectiu ;
  • ua part fixa, corresponent a l'abonament annau, a 40€ HT per an o 20€ HT per an entaus agricultors equipats de « comptaders verds agricòlas ».

E ac sabètz ?

E ètz agricultor ? Que podetz har ua demanda de tarificacion especifica agricòla aiga e assaniment.

Perqué aquera evolucion ?

Qu'a per mira de cobrir l'aumentacion deus còsts de foncionament (energia, mantenença, …) e a afrontar los desfís climatics, com la rarefaccion de la ressorsa en aiga e l'adaptacion necessària de las infrastructuras.
Entà conéisher las accions condusidas per la Comunautat País Basco suu territòri, que podetz consultar los rapòrts d'activitats deus servicis de l'aiga e de l'assaniment, editats cada annada.

Qu'èi besonh d'ajuda

Entà tota question relativa au vòste abonament e las vòstas facturas d'aiga, que contactatz dirèctament lo hornidor de l'aiga sus la vòsta comuna. 

Véder tanben