Alki : un escrin navèth entau floron deu design basco
Dab lo sostien de la Comunautat País Basco, lo fabricant de mòbles contemporanèus Alki qu'a inaugurat lo son navèth talhèr basat a Larressorre, simbèu de la cooperativa e de preservacion deus saber-har.
Actualizat lo : 27 November 2024
Vadut en 1981 d'ua volontat militanta « de víver e tribalhar a País Basco», « Herrian lan eta bizi », Alki que coneish ua escaduda shens frontèra . La cooperativa que distribueish las soas creacions de mobiliari design capvath lo monde : Bibliotèca nacionau de França, lo Palais de l'Elisèu, locaus de Netflix o enqüèra de Google…
Alki qu'obreish uei un capítol navèth deu son desvolopament dab lo son talhèr basat dens la zòna d'activitat Pelen Borda de Larressorre. Eñaut Jolimon de Haraneder, President Director Generau d'Alki, Peio UHALDE fondator de l'enterpresa e Jean-Louis Iratzoqui designer de l'enterpresa qu'an inaugurat los locaus navèths aqueth 18 de noveme aus costats de Jean-René Etchegaray, President de la Comunautat País Basco, Sylvie Durruty, Vicepresidenta ne carga de l'Economia e de l'Innovacion, los elegits locaus, arquitèctes e tots los partenaris engatjats dens aqueth projècte ric de sens entau territòri.
La Comunautat País Basco au sostien deu desvolopament d'Alki
Au travèrs aquera inauguracion, la Comunautat País Basco que reafirma lo son ròtle centrau au servici deu desvolopament economic e mei particularament de florons taus com Alki. L'edifici d'8 500 m², navèth espaci productiu de la cooperativa, qu'ei estada co-finançat per l'Aglomeracion e lo Departament a hautor de 600 000 euros.
« lo noste esquèma de desvolopament economic qu'ei resoludament virat cap tà un desvolopament de l'economia productiva, provedidora d'emplecs qualificats e duradís. Tots los nostes acompanhaments e dispositius d'ajuda dirècta que vienen respóner ad aqueth objectiu. Aquera inauguracion que n'ei un exemple concrèt puishqu'aqueth projècte d'Alki qui avem acompanhat que permet de har rajar lo territòri, d'i crear riquessa e de sostiéner l'emplec » qu'a soslinhat Jean-René Etchegaray .
Creada en 2014, la zòna d'activitats de l'Aglomeracion on s'implanta uei Alki qu'arcuelh un vintenat d'enterpresas artisanaus e de produccion, regropant près de 120 emplecs.
Lo site istoric d'Alki a Itxassou dedicat a l'economia circulara
En parallèla, la Comunautat País Basco qu'a recrompat lo bastiment istoric d'Alki situat a Itxassou, entà n'assegurar la continuitat en tèrmes d'activitats productivas. Aqueth site lèu reabilitat que serà dedicat au desvolopament de l'economia circulara e deu reemplec. Ua plantanha navèra d'enterpresas qu'i veirà lèu lo dia .