La navèra sala omnispòrts d'Amikuze inaugurada
Aqueth dimèrcs 7 de mai, Jean-René Etchegaray, President de la Comunautat País Basco, Arnaud Fontaine, Vicepresident ne carga deus equipaments esportius comunautaris, Charles Massondo, Maire de Saint-Palais, Émilie Dutoya, Elegida deu territòri País Basco au Conselh Regionau de Novèla Aquitània, Jean-Jacques La Sèrra, President deu Conselh departamentau de Pirenèus Atlantics e Jean-Marie Girier, Prefècte de Pirenèus Atlantics, qu'an inaugurat la navèra sala omnispòrts d'Amikuze . Aquera installacion que respon sustot aus besonhs deus 1 500 licenciats deus clubs e aus escolans deus establiments escolars.
Actualizat lo : 9 May 2025
La navèra sala omnispòrts qu'ei estada inaugurada aqueth dimèrcs 7 de mai, a Sent Palais, comuna « Petita Vila de Doman » qui prepausa servicis publics de qualitat a l'ensemble deu territòri d'Amikuze, un bacin de vita de 10 000 abitants. Aqueth projècte que respon atau a la volontat de malhatge deu territòri de la Comunautat País Basco.
Ua sala omnispòrts qui va « rajar sus totas las comunas a l'entorn » tau com l'a soslinhat Jean-René Etchegaray, pr'amor que « 90% deus 1 500 esportius licenciats que son joens e deus adultes de tot Amikuze, mes tanben d'Iholdi-Oztibarre e quitament de Bearn ».
Arnaud Fontaine qu'a raperat que « aqueth equipament qu'ei estat pensat en complementaritat dab las infrastructuras existentas e de faiçon participativa ; en includint los futurs utilizators entà definir los besonhs collectivament ». Aqueth obratge que vien atau completar la sala comunau Airetik bastida en 1984, vaduda tròp estreta entà respóner aus besonhs deus clubs esportius, deus establiments escolars e deus abitants.
Ua sala navèra au còr de la plana deus espòrts d'Amikuze
Aquera sala que s'intègra dens la plana deus espòrts d'Amikuze, qui compren dejà terrens de rugbi, de fotbòl, ua piscina, ua pista d'atletisme e de las corts de tenís comunautàrias aus costats de salas comunaus com la sala Airetik. Ua senhaletica navèra qu'ei d'alhors estada metuda en plaça a la prima entà guidar los usatgèrs e fluidificar la circulacion deus bus dens aqueth espaci de près de 7,5 ectaras.
Aqueth navèth espaci polivalent qu'enriquí l'auhèrta esportiva deu territòri . Que permeterà la practica deu handbal, deu basquet, deu judo, deu volleyball.
Qu'ei ua vertadèra plusvalua entà las cinc seccions esportivas concernidas e sustot entà :
- lo handbal, dab un terren omologat a las dimensions reglamentàrias
- lo judo, dab un dojo qui permeterà d'arcuélher autanlèu març de las competicions departamentaus
Los 1 300 escolans de las escòlas, collègis e licèus deu territòri que van beneficiar de la sala navèra omnisport. Las divèrsas classas que van realizar en mejana 50 òras d'educacion fisica e esportiva dens la navèra sala omnispòrts.
Ua sala responent a las exigéncias environamentaus
La construccion que respon a las nòrmas environamentaus e qu'ei estada pensada entà facilitar lo confòrt deus esportius e deu public com l'entertien deus locaus. L'esclairatge naturau abondant qu'ei assegurat per de granas susfàcias vitrées orientadas au nòrd, evitant tota esmiraglada pendent las partidas. Lo cauhatge qu'ei estat suenhat dab un plafon radiant dens l'aira de jòc principau, mentre que lo dojo benefícia d'un sistèma intelligent qui s'adapta automaticament a la temperatura exteriora.
Budget de la sala omnispòrts d'Amikuze
Montant totau HT : 4 750 000 €
Comunautat País Basco : 1 825 182 €
Comuna de Saint-Palais : 1 186 000 €
Departament de Pirenèus Atlantics : 798 885 €
Estat/DETR/DSIL : 489 933 €
Region Novèla Aquitània : 450 000 €