País Basco : la Banca Alimentària lança la soa 41ᵉ collècta nacionau
Deu 28 au 30 de noveme de 2025, la Banca Alimentària de País Basco que compta sus la mobilizacion de tots entà collectar vitalhas alimentàrias destinadas aus plus des·hornits.
Actualizat lo : 24 November 2025
Cada annada, la Banca Alimentària qu'organiza la soa grana collècta nacionau . A País Basco, près de 950 benevòles que seràn mobilizats entà collectar un maximum de vitalhas e respóner a la demanda creishenta. Pendent tres dias, los produits alimentaris secs e los produits d'igièna de prumèra necessitat que seràn collectats dens mei de 90 punts de collècta a País Basco : supermercats, especierias, enterpresas, escòlas, comunas…
En 2024 a País Basco, que son 13 000 personas qui son estadas ajudadas per la Banca alimentària. Entà respóner ad aquera demanda, la Banca Alimentària que s'apièja sus un hialat hòrt de benevòles e d'associacions locaus. En tot que son près d'ua centena de partenàrias qui sostienen l'activitat de l'associacion.
Aquera annada, la collècta que pren un relèu particular dab l'Orquèstra de País Basco – Iparraldeko Orkestra, pairin de l'operacion 2025. Entau lançament de la collècta, mantun musician que serà present lo divés 28 de noveme a 10h00 au Leclerc BAB, avienguda deu Bòsc Belin a Anglet, entà partatjar lo lor talent e encontrar lo public.
Si podetz consacrar quauquas òras entà triar los dons dens l'enterpaus o ajudar a las pòrtas de las botigas, qu'escrivetz a ba641@banquealimentaire.org o qu'aperatz lo 05 59 55 05 00.