Quan las coscolhas balhan ua vita navèra au beton
Ua equipa de cercaires de l'UPPA installada suu campus Montaury a Anglet qu'a creat un navèth beton ecologic a partir de dèishas de clescs d'ústrias. Aqueth programa de recèrca innovant, sostienut per la Comunautat País Basco, qu'a per mira de diminuïr la mèrca carbòni deu sector de la construccion en creant ua cordèra economica locau.
Actualizat lo : 30 October 2026
Quau ei lo punt comun enter lo camin miant au pè de la duna deu Pilat, la plaça d'ua gara rotèra en Polinesia, o los abòrds deu navèth centre aqüatic El Hogar d'Anglet : un beton ecologic concebut a partir de dèishas de clescs d'ústria trissats.
Lo projècte, batejat Valocoq, qu'ei iniciat en 2021 per l'equipa de cercaires deu Laboratòri deus Fluides Complèxes e de las lors Sèrvas (LFCR) de l'Universitat de Pau e deus País d'Ador, basada a Anglet.
« Dens un beton classic, lo sable e los gravilhons que forman la basa deu materiau . Que'us remplaçam ací per dèishas de clescs d'ústrias trissadas », qu'explica David Grégoire, ensenhant-cercaire.
La Comunautat País Basco qu'acompanha aquera recèrca dens l'encastre deu son aperet a iniciativas de recèrca collaborativa d'excelléncia (AIRCE). Lo son sostien qu'a sustot permetut de finançar lo tribalh d'ua cercaira contractuau cargada d'estudiar l'impacte environamentau deu materiau e d'ac comparar au d'un beton classic.
Deus clescs trissats devath los vòstes pès
Au centre aqüatic El Hogar, a Anglet, mei de 1 000 m² a l'entorn deu bacin nordic e deu parcatge que son estats amainatjats dab aqueth beton . Las dèishas de clescs utilizats que provienen de las resèrvas ostréicoles deu bacin d'Arcaishon e d'Òssagòr. Lo projècte qu'assòcia atau recèrca scientifica, enterpresas e ressorsas disponiblas dens la region. « En estant au mei près deus jaç, que limitam d'autant mei l'impacte environamentau », qu'explica lo Pr . David Grégoire.
Lo nacre, ultra-resistenta !
N'ei pas aquí lo sol atot deu materiau . Aqueth beton navèra generacion qu'ei plan resistent, a l'imatge deu materiau « fascinant » dont s'inspira : lo nacre. « Elle qu'a ua resisténcia a la rompedura 100 còp superior . Que s'ahorteish quan la se copa », precisa lo cercaire.
Lo beton innovant qu'ei egaument testat entà diferents amainatjaments deu litorau. A Biàrritz, un blòc de proteccion qu'ei estat realizat sus la plaça de la Plaja Grana. A Socoa, los cercaires qu'an tribalhat sus la reparacion d'obratges deu pòrt e observat la faiçon dont la vita marina coloniza aqueras susfàcias. Autas experimentacions que son estadas miadas dens tèrras mei luenhècas, sustot en Polinesia.
Lo projècte de recèrca de Valocoq hèit tanben deus emules. Suu bacin d'Arcaishon, ua enterpresa especializada dens l'esglachada de las coscolhas que s'ei recentament creada . De qué illustrar l'interès creishent entà la valorizacion d'aqueras dèishas e la possibilitat, a tèrme, d'estructurar ua cordèra navèra entà ne har ua ressorsa.