Talhèr de l'Innovacion, l'innovacion au servici de las transicions

Contèxte e objectius

En 2025, la Comunautat d'Aglomeracion País Basco que conduseish la tretzau edicion de l'Aperet a projèctes « Talhèr de l'Innovacion ». Aqueth Aperet a projèctes qu'a per mira de portar un sostien a las enterpresas deu territòri desvolopant un projècte innovant, dens lo maine de l'economia productiva.

Enterpresas e projèctes eligibles

Eligibilitat deus portaires de projècte

Que son eligibles los portaires de projècte responent a l'ensemble deus critèris seguents :

• Enterpresa e associacion emplegaira de mensh de 250 salariats (ETP) (efectiu assolidat) ;
• Enterpresa sola, o gropament d'enterpresas ligadas per un projècte partenarial. A notar : en cas de gropament, ua enterpresa que pilòta que deurà estar identificada e que serà l'unic beneficiari de la subvencion ligat au projècte presentat ;
• Actor de l'economia productiva : enterpresa realizant l'acte de produccion suu territòri de la Comunautat d'Aglomeracion País Basco. Tots los maines d'activitats que son eligibles, dab l'excepcion de la cordèra agricultura / agroalimentària / pesca entà la quau dispositius d'ajuda dedicats son començats ;
• Istoric e potenciau de creishença (dus darrèrs bilanç d'activitats autant existent) ;
• Capacitat de finançament deu projècte ;
• Enterpresa avent lo son centre de decision suu territòri de la Comunautat d'Aglomeracion País Basco ;
• Condicion de non-atribucion de subvencion a l'innovacion per la Comunautat d'Aglomeracion :
  • dens las 2 darrèras annadas dens l'encastre d'ua borsa d'incubacion ;
  • dens las 3 darrèras annadas en l'abséncia de borsa d'incubacion.

Eligibilitat deus projèctes

Caractèr innovant

L'Aperet a projèctes « Talhèr de l'Innovacion » que concerneish projèctes relhevant d'ua innovacion entenuda ací dens la soa significacion mei larja. Que s'ageish donc d'un procediment, procediment, usatge o produit navèth començat dens los camps economics, sociaus, societaus, environamentaus e/o organizacionaus. Las innovacions que son donc de tot ordi, de tota intensitat (innovacion de rompedura, incrémentale o d'assemblatge).

Tot parièr com las edicions precedentas, las estructuras o projèctes de l'economia sociau e solidària productius que poiràn egaument argumentar lo lor engatjament. 

Deus projèctes au caractèr duradís

La Comunautat d'Aglomeracion País Basco que desira acompanhar innovacions afectant positivament l'environament, lo territòri e la societat. Aqueth aperet a projèctes que mira atau a sostiéner las enterpresas presentant innovacions a impacte qu'ei a díser portant ua responsa a las problematicas environamentaus, societaus actuaus. 

Qué s'agesca de la presa en compte d'enjòcs environamentaus o sociaus o deu desvolopament d'ua desmarcha de start-up o enterpresa a impacte, cada gra d'engatjament que serà valorizat .

Tenent compte de l'engatjament de l'Aglomeracion sus l'economia de la ressorsa en aiga, aquera tematica, shens estar exclusiva, que serà valorizada pendent l'instruccion deus dossièrs de candidatura. Que seràn donc favorizats los projèctes innovants a baish nivèu d'impacte sus la ressorsa en aiga, mirant los estauvis en aiga dens los procediments industriaus, los usatges domestics, la construccion etc… 

Creacion de valor

Quau que sia la lor natura, los projèctes somés que deuràn portar un avantatge e crear valor entà l'enterpresa sus un mercat o sus un territòri. Que miraràn atau lo desvolopament de l'enterpresa e l'acceleracion de la soa creishença. En aqueth sens, que s'inscriuràn dens un business plan e previsionau detalhats demostrant lo lor potenciau efèit accelerador sus la creishença de l'enterpresa. 
Ua part significativa deu desvolopament, de la fabricacion e de la comercializacion d'aqueth produit que deurà estar efectuada suu territòri de País Basco.

Natura deu prèmi : finançament e acompanhament

Los projèctes sostienuts dens l'encastre d'aqueth Aperet a Projèctes que beneficiaràn d'un sostien financèr assortit d'un acompanhament adaptat au projècte .

Finançament

L'Aperet a Projèctes Talhèr de l'innovacion qu'ei dotat d'ua envolopa globau de 250 000 € a despartir enter los laureats devath fòrma d'ua ajuda dirècta versada a l'enterpresa.

Lo taus de subvencion comunautària que serà determinat après instruccion puish validacion de la jurada de seleccion, dens lo respècte deu quadre relatiu a las ajudas d'Estat aplicader aus sectors considerats.

Sia com sia, lo taus d'intervencion ne poirà pas despassar 50% de la sieta de despensas eligiblas retienudas.

A títol indicatiu, los projèctes laureats qu'an istoricament percebut subvencions d'un montant comprés enter 10 e 30 000 €.

Acompanhament

L'acompanhament personalizat dedicat au projècte que serà realizat per las equipas deu desvolopament economic de la CAPB sus ua durada maximau de 24 mes a comptar designacion deus laureats e signatura de la convencion.

Modalitats d'instruccion

Calendari de l'Aperet a Projèctes

L'edicion 2025 de l'Aperet a Projèctes Talhèr de l'innovacion que's debanarà segon lo calendari previsionau seguent :

• Obertura de la fasa de las candidaturas : divés 2 de mai de 2025
• Data limit de recepcion de las candidaturas : divés 18 de julhet de 2025, 23h59
• Analisi deus dossièrs, comitat tecnic e jurada de seleccion : enter julhet e seteme de 2025
• Vòte deus laureats peu Conselh Permanent : dimars 21 d'octobre de 2025
• Ceremonia publica de presentacion deus projèctes laureats : T4 2025

L'Aglomeracion País Basco que's resèrva lo dret d'anullar o de reportar l'Aperet a Projèctes shens que la soa responsabilitat posca pas estar engatjada.

La remesa deus prètz que s'efectuarà pendent un eveniment oficiau .

Critèris de seleccion

La seleccion deus projèctes que serà hèita au par de l'apreciacion deus critèris seguents :

1. Degré d'innovacion deu projècte (innovacion d'usatge, de modèle d'ahars, sociau, etc…) e mejans començats entà la R&D o entad autes intrants de l'innovacion ;
2. Coheréncia dab los enjòcs actuaus de transicion environamentau, tecnologica, economica e/o societau, confortada per ua analisi deu Néo Terra Resultat, un auto-diagnostic desplegat per la Region Navèra Aquitània ;
3. Ancoratge duradís suu territòri e valor aponduda significativa de l'innovacion suu desvolopament deu territòri locau (emplecs, imatge e atractivitat, ecosistèma, associacions, etc.) ;
4. Degré de responsa a ua demanda deu mercat (posicionament diferenciant suu mercat) o a un besonh sociau ;
5. Viabilitat deu modèle economic : coheréncia e capacitat deu projècte dab lo nivèu d'integracion a l'estrategia d'enterpresa e capacitat a miar a plan lo projècte e ac comercializar, adeqüacion deu projècte e mejans dedicats ; capacitat a perennizar economicament lo projècte.

Tà çò deus projèctes relhevant d'ua innovacion sociau, ua grasilha d'avaloracion especifica qu'ei prepausada entà analisar los projèctes sus sheis critèris : 

1. Caractèr novator e concrèt deu projècte, gra de presa de risc (tensions, resisténcias, non apropriacion) e d'experimentacion deu projècte relatiu a la nautat portada ;
2. Caractèr duradís deu projècte (presa en compte deus enjòcs environamentaus, sociaus e societaus, desmarcha de start-up o enterpresa a impacte, etc.) ;
3. Degré de responsa a un besonh sociau deu territòri non-cobèrt actuaument e capaciter a mesurar l'impacte a tèrmi long ;
4. Viabilitat economica e capacitat a perennizar economicament lo projècte e eishamiar aqueste entà inspirar de navèths projèctes e/o cambiar d'escala ;
5. Degré d'implicacion de las partidas beneficiàrias deu territòri (publics e privats) e deus beneficiaris dens l'identificacion deu besonh sociau non cobèrt e la co-construccion de la solucion.

Procediment de seleccion

L'Aperet a projèctes « Talhèr de l'Innovacion » qu'ei portat per la Comunautat d'Aglomeracion País Basco e lo son dispositiu d'acompanhament de l'innovacion Tecnopòli País Basco.

La causida deus projèctes laureats que serà hèita per ua jurada d'elegits sus la basa d'ua analisi tecnica produsida per un comitat tecnic ad hoc sus la basa deus critèris d'eligibilitat e de seleccion presentats ací-abans. Lo comitat tecnic qu'ei animat per la Comunautat d'Aglomeracion País Basco e qu'assòcia BPI França, ESTIA Enterpréner e la French Tech País Basco.

L'afectacion deus crèdits per projècte laureat que's harà dens lo limit de la reglamentacion en vigor e après instruccion peus servicis de la Comunautat d'Aglomeracion País Basco. Cada subvencion que serà puish prepausada a la deliberacion deu Conselh Permanent de l'Aglomeracion País Basco au mei tard a la fin de 2025.

Dens tots los cas e en foncion de la pertinéncia e de la qualitat deus projèctes, deus besonhs de finançament e de la disponibilitat budgetària, la Comunautat d'Aglomeracion de País Basco qu'ei sola arbitra entà validar l'oportunitat d'un projècte, atribuïr ua ajuda dens lo cas d'aqueth Aperet a Projèctes e ne definir lo son montant.

Versament de l'ajuda financèra

La subvencion que serà  versada segon las modalitats seguentas :

• Un acompte de 50% a la signatura de la convencion de finançament ;
• Un sòlde de 50% sus presentacion deus justificatius financèrs e tecnics.

Los projèctes eligibles avent ua durada de realizacion de maximum 2 ans, las enterpresas laureadas qu'auràn dinc au 31/12/2027 entà justificar despensas ligadas au projècte retienut.

Dossièr de candidatura

Depaus de las candidaturas

La candidatura que deurà estar obligatòriament compausada de las pèças demandadas ací devath. La candidatura que vad efectiva a recepcion de l'ensemble deu dossièr. Tot dossièr incomplet que serà escartat de la seleccion .

Las candidaturas que deuràn estar depausadas sus la platafòrma seguenta : https://atelierdelinnovation.communaute-paysbasque.fr/

Las candidaturas que deven estar transmetudas abans lo divés 18 de julhet de 2025 a 23h59, la data e l'òra GMT de depaus sus la platafòrma hant fe.