Lo patrimòni arquitecturau basco
De las glèisas romanicas a las bòrdas tradicionaus, deus ostaus hòrts medievaus aus edificis deu 19ᵉ sègle, lo patrimòni arquitecturau e arqueologic de País Basco qu'ei particularament ric . Descobritz los edificis recensats, estudiats e protegits suu territòri per la nosta carta interactiva.
Actualizat lo : 17 March 2026
La carta interactiva deu patrimòni arquitecturau basco
La carta interactiva deu patrimòni basco que permet de localizar e d'identificar los principaus edificis arquitecturaus deu territòri. Qu'amassa dadas gessidas de diferentas òbras consacradas au bastit miats despuish mei de vint ans a l'escala locau, regionau e nacionau.
Qué se tròba sus aquera carta ?
Los edificis recensats dens l'encastre de l'elaboracion deus Plans Locaus d'Urbanisme intercomunaus (PLUi)
Aqueth tribalh qu'ei estat miat dab las comunas en Amikuze, Sud Baisha Navarra e en Sola. Après formacion, près d'ua centena d'elegits comunaus qu'an identificat 1 822 edificis, representant un eretatge partatjat peus abitants. Aqueth recensament que constitueish ua atruna d'ajuda a la decision entà las collectivitats, permetent sustot de determinar los edificis susceptibles de har l'objècte d'ua proteccion reglamentària au títol deu còdi de l'urbanisme. Au delà deus PLUi, que contribua a enriquir la coneishença deu patrimòni basco e a ahortir l'implicacion deus ciutadans e deus lors elegits dens la valorizacion e la promocion d'un eretatge comun.
Los edificis estudiats dens l'encastre de l'Inventari generau
L'Inventari generau deu patrimòni culturau que recensa, qu'estúdia e que hè conéisher lo patrimòni bastit sus l'ensemble deu territòri nacionau. Suu territòri de la Comunautat d'Aglomeracion País Basco, cinc operacions d'inventari que's son succedit despuish 1998, produsint 1 077 estudis, realizadas per l'Estat e lo servici regionau Patrimòni e Inventari, en ligam dab las collectivitats locaus. Aqueras dadas que son egaument consultaderas sus la Basa POP (Platafòrma Obèrta deu Patrimòni) deu Ministèri de la Cultura e suu portau deu servici Patrimòni e Inventari de la Region Novèla Aquitània.
Los edificis protegits au títol deus monuments istorics
Classats o inscrivuts, los monuments istorics que son protegits entau lor interès istoric, artistic o arquitecturau. 241 edificis presents suu territòri que figuran sus la carta . Aqueras dadas que son egaument tiradas de la basa POP deu Ministèri de la Cultura.
E ac sabètz ?
La Comunautat d'Aglomeracion País Basco qu'a creat en 2021 ua mission « Inventari deu patrimòni », cofinancée entà mieitat per la Region Novèla Aquitània. Aquera mission qu'a sustot entà mira de melhorar la coneishença deus paisatges e deu patrimòni arquitecturau e urban de País Basco entad ac protegir mélher e ac valorizar. Que contribua tanben a l'elaboracion deus documents d'urbanisme comunautaris (PLUi) e a l'enriquiment deu projècte de Parc naturau regionau de la Montanha Basque.
Focus suu patrimòni pastorau de la montanha basca
En 2022, la Comunautat d'Aglomeracion País Basco e la Region Novèla Aquitània qu'an lançat un inventari dedicat au patrimòni pastorau, conduita segon los metòdes de l'Inventari generau. L'operacion qu'a estudiat mei de 2300 edificis, despartits sus dotze comunas deu futur Parc regionau de la Montanha basca. Aqueth tribalh qu'a permetut de compréner mélher los mòdes d'aucupacion e las practicas pastoraus a las epòcas modèrna e contemporanèa. Los resultats d'aqueth estudi que son consultaders suu site de la Region Novèla Aquitània e que haràn l'objècte d'ua publicacion dens la colleccion « Imatges deu patrimòni » en 2026.
Aquera video, produsida per la Region Novèla Aquitània, presenta lo modèle agropastorau basco. Un patrimòni ancestrau fondat suu respècte de l'animau e de la natura e qui's transmet de generacion en generacion.
