Lurrama 2025 : la 20ᵉ edicion deu salon de l'agricultura paisana de País Basco

Entà celebrar aquera edicion simbolica, Lurrama qu'a causit entà tèma aquera annada « Paysan·nes de doman », dab entà mairia Elena Aguerre (País Basco Nòrd) e pairin Iñaki Intxausti (País Basco Sud). Lo salon que meterà a l'aunor l'ensemble deu territòri en explorant los enjòcs d'installacion, de transmission e de sobeiranetat alimentària.

Los AOP au còr deu programa

Aquera annada, País Basco que serà la region convidada, a l'entorn d'ua tematica centrau : las Apellacions d'Origina Protegidas (AOP). Lo mercat paisan, entièrament reorganizat, qu'amassarà los productors de País Basco dens ua mesa en scèna inedita en fòrma de « U », dedicada a la riquessa deus terradors e aus ligams enter labèls deu Nòrd e deu Sud.

Que seràn sustot representadas las AOP de País Basco Nòrd — Pòrc Kintoa, Piment d'Espelette, Aussau-Iraty, Vin d'Irouléguy — aus costats deus lors omològues deu Sud, taus com lo Txakoli, los hormatges Idiazabal e Roncal, lo Piment de Lodosa, lo Vin de Navarra o enqüèra lo Pomat Euskal Sagarnoa.

Conferéncias e taulas redonas : plaça aus escambis

Mantua conferéncia e debats que vieneràn neurir la reflexion sus l'aviéner de l'agricultura paisana :

Dijaus 6 de noveme a 20h30 – ESTIA (Bidart) : « Quau(s) estrategia(s) d'installacion entà melhorar la sobeiranetat alimentària de País Basco ? », en preséncia de Jean-René Etchegaray, president de la Comunautat País Basco.

Divés 7 de noveme a 17h – Halle d'Iraty : « los AOP, ua guarantida deu manteniment deus paisans a País Basco ».

Autes rendètz-vos qu'abordaràn la transmission, l'accès a la tèrra, lo benestar paisan o enqüèra la formacion de las generacions navèras.

Un rendètz-vos hestiu e familiau

Lurrama, qu'ei tanben un espaci de descobèrta e de partatge entà tots dab :

• Lo mercat bordièr, dab las soas tastas e produits labellisés,
• Lo canton deus animaus, presentant mei d'80 raças locaus,
• Lo pòle vegetau, dedicat a las produccions emblematicas deu territòri,
• E lo canton deus mainatges, dab talhèrs pedagogics animats per ua quinzena d'associacions partenàrias.

Mei de 2 000 escolans de las escòlas de País Basco que son esperats lo divés 7 de noveme .

Concors de hormatges e de pans, animacions musicaus, demostracions agricòlas, tastas d'AOP e repaishs hestius que vieneràn ritmar aqueths tres dias plaçats devath lo signe de la convivialitat e de la transmission.

Totas las informacions : www.lurrama.org/index.php/fr/lurrama-2025/