Que melhori las meas practicas en restauracion collectiva

Perqué redusir lo gaspilhatge alimentari dens la restauracion collectiva ?

La luta contra lo gaspilhatge alimentaris que hè partida de l'un deus cinc objectius de la Lei EGAlim (au medish títol qui l'aprovesiment en produits duradís e de qualitat, la diversificacion de las honts de proteïnas, la substitucion deus plastics e l'informacion deus convidats e deus usatgèrs).

Redusir lo gaspilhatge alimentari en restauracion collectiva que permet sustot de :

• Limitar l'impacte environamentau : mensh de gaspilhatge de ressorsas e d'emissions de gas d'efèit de sèrra ;
• Sensibilizar los consumeires a la reduccion de las dèishas e contribuar a la securitat alimentària per accions de redistribucion ;
• Optimizar los còsts e melhorar la gestion deus estòcs.

Qué digó la reglamentacion ?

Lo sector de la restauracion collectiva publica e privada qu'ei tienut :

• d'efectuar un diagnostic deu gaspilhatge alimentari de l'establiment ;
• de méter en plaça ua desmarcha de luta contra lo gaspilhatge alimentari ;
• de prepausar ua convencion de dons a ua associacion abilitada, quan un establiment prepara mei de 3 000 repaishs per dia.

Qu'ei defendut de destrusir vitalhas alimentàrias enqüèra consumideras o de'us har impròpis a la consomacion. L'infraccion ad aquera disposicion qu'ei susceptibla d'ua emenda de 3 750 €.

La lei Climat e resiliéncia, promulgada lo 22 d'aost de 2021, qu'a previst egaument la mesa en plaça d'ua experimentacion de solucions de reservacion de repaish en restauracion collectiva entà lutar contra lo gaspilhatge alimentari. Aquera experimentacion, prevista sus 3 ans, que concerneish los gestionaris volontaris de servicis de restauracion collectiva dont las personas moraus de dret public an la carga.

Entà mei d'informacions que'vs podetz tornar suu site deu governament o de la prefectura.

Si desiratz contactar la Comunautat País Basco suu subjècte, que'ns podetz escríver a l'adreça seguenta : alimentation.durablecommunaute-paysbasquefr

Qué pòdi méter en plaça entà redusir lo gaspilhatge dens los restaurants collectius de la mea comuna ? 

Avalorar las meas practicas e sensibilizar en intèrne

Entà redusir lo gaspilhatge alimentari dens las cantinas, qu'ei utile de mesurar la quantitat de neuritud degalhada en pesant las dèishas alimentàrias, çò que permet puish d'ajustar las porcions e los menuts entà respóner mélher aus besonhs reaus. En parallèla, la sensibilizacion deus mainatges e deu personau que jòga un ròtle essenciau entà har compréner las consequéncias deu gaspilhatge alimentari. Aquò que's pòt har per discussions, de las afichas, deus talhèrs o de las accions educativas. L'objectiu qu'ei de cambiar las costumas de consomacion e de favorizar un comportament mei responsable de cap a la neuritud.

L'acompanhament de Bil La toa Garbi entà redusir lo gaspilhatge

Conscienta de l'enjòc qui aquò que representa dens las cantinas escolaras, la Comunautat d'Aglomeracion País Basco qu'a metut en plaça ua animacion dedicada en se prement los Animators entà la Reduccion e la Tria de las Dèishasdeu Sindicat Bil La toa Garbi. Despuish l'aviada deu projècte en 2019, 23 cantinas escolaras que son estadas acompanhadas que sian en gestion dirècta (fabricacion deus repaishs sus plaça) o en gestion concedida (fabricacion deus repaishs per un prestatari e liurason sus la cantina). A títol d'exemple, entaus establiments qui an beneficiat de l'acompanhament sus l'annada escolara 2022-2023, la mejana de gaspilhatge alimentari per platèu qu'èra de 137g . Sus la basa d'aqueths resultats, las comunas que son estadas convidadas a méter en plaça accions qui a per mira de diminuïr lo gaspilhatge com : adaptar la comanda deus repaishs en foncion deu nombre de mainatges, adaptar la quantitat, installar un « gachimètre » deu pan, etc.

La sensibilizacion a l'alimentacion duradissa dab sarda Sardexka

La Comunautat País Basco hèit egaument de la sensibilizacion a l'alimentacion duradissa e de qualitat ua prioritat. Ad aqueth efèit, qu'a establit ua convencion dab l'associacion Sarda Sardexka entà miar accions de sensibilizacion a l'alimentacion duradissa dens las escòlas (publicas, privadas, ikastolas) e a destinacion principaument deus mainatges de 7 a 12 ans. Sus la basa de 5 intervencions despartidas tot lo long de l'annada escolara, los mainatges qu'abòrdan tematicas tanben divèrsas e variadas que l’desvelh sensoriau, lo patrimòni culturau, l'environament, la santat e la consomacion. Despuish 2019, 1 230 mainatges que son estats sensibilizats .

Méter en plaça dons a las associacions

Lo don a las associacions dens l'encastre de la restauracion collectiva qu'ei ua desmarcha solidària qui permet de redusir lo gaspilhatge alimentari en valorizant las sobradas de repaishs non consumits. Meilèu que de getar aqueras vitalhas, la collectivitat que'n pòt har don a associacions locaus, qui's cargan de'us redistribuïr a las personas en situacion de precaritat. Aqueth gèste que contribua a diminuïr l'impacte environamentau en ahortint la solidaritat dens la comuna. Ua tau iniciativa qu'exigeish ua organizacion plan estructurada entà garantir la securitat sanitària deus produits.

Qu'existeish mantua associacion de solidaritat entà las personas en situacion de precaritat a País Basco : cosina Atherbéa, Taula deu ser, Zuekin,BAB Solidari.

L'associacion Las Glacèras Solidàrias que prepausa de collectar las sobradas alimentàrias gessidas de l'événementiel o deus professionaus entà los redistribuïr ad aqueras associacions.

Installar frigòs solidaris

Lo Centre Ressorsa d'Ecologia Pedagogica de Novèla Aquitània (CREPAQ) qu'a desvolopat despuish 2018, un projècte innovant : lo Frigò Zèro Gaspilhatge.

Lo principi que consisteish a méter a disposicion sus l'espaci public deus equipaments en autoservici, 24h/24 e 7j/7, compausats d'un armari frigorific e d'un guardaminjar, dens los quaus tot un cadun que pòt viéner depausar e/o préner neuritud a la soa convenéncia e segon los sons besonhs e aqueth, dens un estricte respècte de las règlas d'igièna e de securitat sanitària deus aliments. 

Los tres objectius principaus deu Frigò Zèro Gaspilhatge que son : 

• Redusir lo gaspilhatge alimentari ;
• Crear ligam sociau e de la solidaritat ;
• Facilitar l'accès au don alimentari entà las personas en situacion de precaritat.

Despuish 2018, lo CREPAQ qu'a realizat mei de 24 installacions dens la Region Novèla Aquitània. 

Si desiratz installar un Frigò Solidari sus la vòsta comuna, que podetz contactar lo CREPAQ : contactcrepaqong

L'acompanhament de las comunas a la reduccion deu gaspilhatge alimentari dens las cantinas

Las comunas qui desiran har desaparéisher lo plastic de la lor cantina (contenents alimentaris de cueita, de que rescauha o enqüèra de servici) o plan se dotar d'equipaments qui a per mira de redusir lo gaspilhatge alimentari, que pòden demandar un sostien financèr per l'aperet a projèctes Alimentacion duradissa. 

Entà obtiéner informacions sus aqueth aperet a projèctes, que podetz enviar un email a l'adreça seguenta : alimentation.durable@communaute-paysbasque.fr

L'acompanhament de las associacions de sensibilizacion e d'educacion a l'alimentacion duradissa

Si desiratz estar acompanhat per la Comunautat País Basco dens ua desmarcha de reduccion deu gaspilhatge alimentari o si avetz autas desmarchas locaus a prepausar, que'ns podetz escríver a l'adreça email seguenta : alimentation.durablecommunaute-paysbasquefr

Que podetz egaument demandar un sostien financèr peu Fons de sostien Transicion Ecologica e Energetica. Qu'a per mira d'encoratjar las associacions (esportivas, culturaus, de léser, a vocacion sociau, educativa, sensibilizacion a l'alimentacion duradissa, etc.) a méter en plaça accions concrètas entà la transicion ecologica e energetica deu territòri.