Contracte Resiliéncia e Proessa

Los enjòcs 

La Comunautat d'Aglomeracion País Basco que s'ei dotada en heurèr de 2019 deu son Esquèma de Desvolopament Economic (SDE). Esquissant dens un prumèr temps los enjòcs grans deu territòri, aqueth esquèma qu'afirma las ambicions granas a cort e mejan tèrmes portadas per l'Aglomeracion entà concórrer au desvolopament de l'economia productiva deu territòri e a l'innovacion, en anticipant los desfís societaus a viéner, ecologics e energetics.

Entà montar en poténcia dens lo son acompanhament, la Comunautat País Basco qu'a  desplegat un dispositiu navèth d'ajuda dirècta : lo Contracte resiliéncia e proessa.

Presentacion deu dispositiu

L'ambicion prumèra deu dispositiu qu'ei d'accelerar lo desvolopament de las enterpresas productivas en conciliant proessa industriau, reduccion de la mèrca environamentau e creacion d'un impacte sociau positiu. Lo dispositiu que contribuarà au trespassatge d'un cap màger dens lo desvolopament de las enterpresas acompanhadas e a la creacion d'emplecs qualificats e perennes.

Lo dispositiu que fonciona dens ua logica de contracte enter la Comunautat País Basco e l'enterpresa beneficiària. Que permet de bastir dab aquera darrèra un plan d'accions adaptat a las soas especificitats mestièrs, los sons enjòcs, la soa maturitat organizacionau e la soa vision estrategica.

La durada de l'acompanhament (3 ans) que permet de bastir ua relacion duradissa enter l'Aglomeracion País Basco e l'enterpresa e d'impulsar ua desmarcha globau e sequenciada dens l'enterpresa, dab ua projeccion a mejan e long tèrmes de la soa estrategia de desvolopament.

Lo Contracte resiliéncia e proessa qu'ei  estructurat a l'entorn de 3 tematics pielars :

• Transicion ecologica e energetica ;
• Productivitat e melhorament de las condicions de tribalh ;
• Innovacion e resiliéncia.

Cada pielar qu'ei declinat en mantua accion identificada com prioritàrias per la Comunautat País Basco entà perméter a las enterpresas de s'i escàder ua transicion duradissa cap a un modèle industriau resilient, innovant e responsable.

Las enterpresas qui son acompanhadas dens l'encastre d'aqueth dispositiu que deven presentar un projècte globau e s'engatjar sus la realizacion de 3 a 6 accions dont a minima ua sortida deu pielar « Transicion ecologica e energetica » : descarbonacion deus procediments e sites industriaus, au par de l'urgéncia ligada a la reduccion d'impacte environamentau de las activitats industriaus.

A qui s'adreça ?

Lo Contracte resiliéncia e proessa que s'adreça a las enterpresas de produccion, o de servicis a la produccion avent equipaments ligats a la produccion, de mei de 3 ans e comptant enter 5 e 250 salariats. Las associacions emplegairas, portant ua activitat productiva, que son egaument eligiblas .

Las enterpresas que deven estar actoras de l'economia productiva, qu'ei a díser realizar l'acte de produccion suu territòri de la Comunautat d'Aglomeracion País Basco dab ua capacitat de decision locau.

En qué consisteish l'ajuda ?

Los projèctes sostienuts dens l'encastre deu dispositiu Contracte resiliéncia e proessa que benefícian d'un sostien financèr devath fòrma de subvencion plafonada a 200 000 € maximum per dossièr. 

Segon las accions retienudas, las despensas eligiblas que pòden estar de tres naturas : 

• conselhs e prestacions extèrnas ; 
• investiments 
• recrutaments. 

Las enterpresas que pòden har l'objècte d'autas demandas d'ajuda dens lo respècte de la reglamentacion ligada au cumul de las ajudas publicas.

Los projèctes presentats que deuràn aver un calendari previsionau d'engatjament de las accions seleccionadas de 24 mes maximum e de realizacion de 36 mes maximum a comptar data de depaus deu dossièr.

Com har la mea demanda d'ajuda ?

Qu'ètz portaire de projècte e que desiratz un acompanhament de l'Aglomeracion per aqueth dispositiu ?

• Estapa 1 : Qu'adreçatz un corrièr de sasina a l'atencion deu President de l'Aglomeracion País Basco, presentant la vòsta enterpresa, lo vòste projècte de desvolopament e sollicitant l'intervencion de la Comunautat d'Aglomeracion País Basco entà vs'acompanhar.
• Estapa 2 : L'instructor deu dispositiu que prenerà estaca dab vosautas entà verificar la vòsta eligibilitat e definir a las vòstas quotats lo contienut de las accions qui figuraràn dens lo Contracte Resiliéncia e Proessa. Un dossièr que'vs serà alavetz comunicat entà formalizar la vòsta demanda.
• Estapa 3 : Que completatz lo dossièr e que junhetz l'ensemble de las pèças justificativas per via numerica a l'instructor de l'Aglomeracion País Basco.
• Estapa 4 : A recepcion deu dossièr de demanda complet, l'instruccion qu'ei realizada . L'autrei d'ua ajuda financèra qu'ei puish prepausada aus vòtes deus elegits, en conselh permanent de la Comunautat d'Aglomeracion País Basco, qui s'amassa 8 còps per an.
• Estapa 5 : L'atribucion de l'ajuda qu'ei notificada per corrièr . Ua convencion qu'ei signada enter l'enterpresa sostienuda e l'Aglomeracion País Basco.