País Basco : las caras de la solidaritat
Dens aquera navèra websérie, qu'avèvam a còr de méter en lutz aqueras iniciativas deu quotidian qui ns'amassan, aqueths còps de poç qui permeten d'afrontar l'adversitat, aqueras aviadas de solidaritat e d'enteraida qui tornan espèr e coratge. Que son benevòles dens associacions umanitàrias, parents d'escolans defensors de l'euskara, artistas engatjats au près de publics en situacion de handicap, coachs esportius entà hemnas victimas de violéncias conjugaus o intervienents sociaus dens los quartièrs populars. Qu'an causit de consacrar lo lor temps a ajudar los autes. Que son las caras sovent anonimas de la solidaritat a País Basco . Que hèm enténer las lors votz !
Actualizat lo : 29 December 2026
Episòdi 1 - Un camion solidari entà lutar contra la precaritat estudianta
En associacion dab lo CROUS e la Banca Alimentària País Basco, la Crotz Roja de Baiona qu'a montat un dispositiu nommat « la Crotz Roja sus ròdas ». Cada dijaus pendent lo periòde escolar, ua equipa de benevòlas que distribueish produits alimentaris e d'igièna a estudiants en situacion de precaritat.
Episòdi 2 - Deus paquets de Nadau entà sostiéner las ikastolas e los productors de Sola
Despuish mei de vint ans, las duas ikastola de Sola que s'assòcian entà l'operacion Ikaskoli . Que confeccionan a Nadau deus cofrets presents dab produits locaus entà finançar las lors escòlas mes tanben sostiéner los productors souletins.
Episòdi 3 - Deus trampolins espòrt entà ajudar las hemnas violentadas a se tornar bastir
Lo programa deus trampolins Espòrt Santat qu'ei estat lançat quate ans a per l'Ostau Espòrt Santat País Basco Ador. En encoratjant l'exercici fisic, l'associacion que vòu perméter a las victimas de violéncia conjugau de despassar lo lor traumatisme.
Episòdi 4 – Que montan sus scèna entà har tombar los prejutjats
Guidats per l'empontaira Amaia Hennebutte, de las personas en situacion de handicap o en sofriment mentau qu'an creat lo lor pròpi espectacle . Que jogavan ua darrèra representacion a Sent-Pée-sus-Nivelle. L'epilògue d'ua experiéncia qui'us a pregondament transformats.
Episòdi 5 – Un programa sus-mesura entà l'entrepreneuriat dens los quartièrs
Lançat en 2019, CitésLab qu'ajuda los abitants deus quartièrs prioritaris de la Vila de Baiona a crear la lor enterpresa. Gràcias ad aqueth programa, Rachedi Menaouar qu'a podut lançar dab escaduda la soa pròpia panisseria.